هاوسەرۆکانی یەکێتی پێشوازییان لە باڵیۆز و کونسوڵی هۆڵەندا کرد

SNN

ھاوسەرۆکانیی یەکێتیی نیشتمانیی کوردستان لەدەباشان پێشوازیانکرد لە میشێل رینتێنەر باڵیۆزی ھۆڵەندا لە عێراق و هانس ئەکەربەوم کونسوڵی ھۆڵەندا لەھەرێم

لەدیدارێکدا بەوردی پێشھات و پرسە سیاسی و ئەمنی و ئابوورییەکان تاوتوێکران و بۆچوونیان لەبارەوە ئاڵوگۆڕکرا و جەختکرایەوە لە بەردەوامی پشتیوانییەکانی یەکێتی بۆ پێشخستنی پەیوەندییەکان لەگەڵ ھۆڵەندا و فراوانکردنی ھاریکاری نێوان ھەردوولا لەپێناو بەرژەوەندییە باڵاکانی گەلی کورد.

ھەر لەدیدارەکەدا ھاوسەرۆکانی یەکێتی رایانگەیاند ھەلومەرجی گۆڕاو و رووداوەکان وادەخوازێت بەکۆدەنگی خۆمان بۆ پرسەکان ئامادە بکەین و کێشەکانمان لەگەڵ بەغدا لەسەر بنەمای دەستوور و یاسا چارەسەر بکەین.

لەبارەی حکومڕانی ھەرێم و نێوماڵی کورد ھاوسەرۆکانی یەکێتیی نیشتمانیی کوردستان تەئکیدیان لە حکومڕانییەکی باشترکردەوە کە داخوازییەکانی ئەمڕۆی کۆمەڵانی خەلك بەرجەستە بکات و لەئاست بژێوی و قەیران و گرفتەکاندا بێت.

ھەر لەدیدارەکەدا لەبارەی مەترسییەکانی تیرۆریستانی داعش و پاشماوەکانیان لەعێراق بەگرنگییەوە ئەم پرسە تاوتوێکرا و ھەڵسەنگاندن بۆ دۆخی ئەمنی کرا و بەرچاوڕوونی درایە ئامادەبووان و پێویستی بەردەوامی ھەماھەنگی و ھاوکاری لەنێوان ھێزەکانی ھەرێم و ھاوپەیمانان دووپاتکرایەوە لەپێناو سەقامگیری و ئاسایشی زیاتر لەناوچەکە .