لیوا قاره‌مان كه‌مال: ئه‌وه‌ى دوێنێ روویدا رووبه‌ڕووبوونه‌وه‌ى گه‌ریلا و پێشمه‌رگه‌ نه‌بوو

0
398
پێشمه‌رگه‌یه‌ك له‌كاتى ئه‌ركدا | فۆتۆ: Sebastian Meyer/Corbis

SNN ـ بڕیار محەمەد
جێگری سەرۆك ئەركان بۆ كاروباری ئۆپراسیۆن لە وەزارەتی پێشمەرگەی حكومەتی ھەرێم رایده‌گه‌یه‌نێت: هه‌رچه‌نده‌ دوێنێ وا بڵاوكرایه‌وه‌ كه‌ شه‌ڕ و پێكدادان له‌نێوان هێزه‌كانى پێشمه‌رگه‌ و گه‌ریلا روویداوه‌، به‌ڵام ئه‌و بابه‌ته‌ دووره‌ له‌ راستییه‌وه‌.

‌دوێنێ چوارشه‌ممه‌ به‌شێك له‌ میدیاكان بڵاویانكرده‌وه‌ كه‌ له‌ ناحیه‌ى چه‌مانكێ سه‌ربه‌ ئامێدى، پێكدادان له‌نێوان گه‌ریلاكانى پارتى كرێكارانى كوردستان و هێزه‌كانى پێشمه‌رگه‌ روویداوه‌، به‌هۆیه‌وه‌ پێشمه‌رگه‌یه‌ك شه‌هیدبووه‌ و دوو پێشمه‌رگه‌ى تریش برینداربوون، دواتر حكومه‌تى هه‌رێم به‌ هێرشى په‌كه‌كه‌ گوزارشتى لێكرد و ئیدانه‌ى كرد.

لیوا قاره‌مان كه‌مال، جێگری سەرۆكی ئەركان بۆ كاروباری ئۆپراسیۆن لە وەزارەتی پێشمەرگەی حكومەتی ھەرێم له‌و باره‌یه‌وه‌ به‌ SNNى راگه‌یاند: “به‌داخه‌وه‌، دوێنێ لە بەشێک لە میدیاكان وا بڵاوکرایه‌وە کە گوایە شەڕ لەنێوان هێزەکانی پێشمەرگە و گەریلاکانی پەکەكە روویداوه‌ له‌ ناحیه‌ى چه‌مانكێ له‌ ئامێدى، به‌ڵام لە راستیدا هیچ شەڕێك لەنێوان هێزەكانی پێشمەرگە و گەریلاكانی پەكەكە لەناو خاكی هەرێم رووینەداوە”.

وتیشى: “راستی رووداوەكە بەمشێوەیە بووە، كە هێزێكی پێشمەرگەی زێرەڤانی لەو ناوچەیە ویستویانە سەنگەر لێبدەن، بەڵام لەكاتی لێدانی سەنگەردا بۆمب بە هێزەكانی پێشمەرگەدا تەقیوەتەوە، بەهۆیەوە یەک شەهید و برینداربوونی چەند پێشمەرگەیەکی تری لێ كەوتووه‌تەوە”.

به‌پێ زانیارییه‌كانى SNN كه‌ له‌ چه‌ند فه‌رمانده‌یه‌كى سه‌ربازییه‌وه‌ وه‌ریگرتوون، “لە دوێنێ شەوەوه‌ جارێکی تر پارتی دیموکراتی کوردستان بەشێک لە هێزەکانی بۆ سنووری بادینان جوڵە پێکردووە، لەبەرامبەریشدا پارتی کرێکارانی کوردستان تەواویی هێزەکانی دیکەی لە تەواوی ناوچە سنوورییەكان خستووه‌ته‌ حاڵەتی ئامادەباشیه‌وه‌”.

بەشی بکە لە
Previous Next
Close
Test Caption
Test Description goes like this