جێگری سەرۆكی لیژنەی پێشمەرگە زانیاری نوێ‌ لەبارەی ڕووداوەكەی چەمانكێ‌ دەخاتەڕوو

0
669

SNN-عەلی حەمە سەعید
جێگری سەرۆكی لیژنەی پێشمەرگە لە پەرلەمانی كوردستان ئاماژە بەوەدەكات “ئەوەی دوێنێ‌ لە سنووری چەمانكێ‌ ڕوویدا ڕووبەڕووبوونەوەی چەكداری نەبووە جگە لەوەی تەقینەوەی بۆمبێك بووە”.

عوسمان كەریم، جێگری سەرۆكی لیژنەی پێشمەرگە لە پەرلەمانی كوردستان بە SNNی ڕاگەیاند: بەگوێرەی ئەو بەدواداچوونانەی كە ئێمە كردوومانە، ئەوەی دوێنێ‌ لە سنووری چەمانكێ‌ لە نێوان هێزەكانی پەكەكە و پارتی ڕوویداوە، حاڵەتی تەقەكردن و ڕووبەڕووبوونەوەی چەكداری نەبووە لەگەڵ یەكتریدا، بەڵكو تەنها تەقینەوەی بۆمبێك بووە بە ئۆتۆمبێلێكدا كە ژمارەیەك پێشمەرگە تیایدا بریندار بووە و بەداخەوە یەكێكیشان شەهید بووە.

ئاماژەی بەوەشكرد، ئێمە نازانین ئەو بۆمبە لە لایەن چ لایەنێك و بە چ مەبەستێكیش دانراوە، بەڵام خۆشبەختانە لە ئێستادا دۆخەکە بەرەو هێوربوونەوەی زیاتر دەچێت و ئێمەش لە پەرلەمانی كوردستان هەوڵەكانمان دەستپێكردووە بۆ ئەوەی لەوە زیاتر دۆخەكە بەرەو ئاڵۆزی نەڕوات، چونكە جگە لەوەی هاووڵاتییانی ئەم هەرێمە زیانیان بەردەكەوێت، هیچ سوودێكی نابێت.

جێگری سەرۆكی لیژنەی پێشمەرگە لە پەرلەمانی كوردستان ئەوەشی ئاشكراكرد، كە هەوڵێكی ناوخۆیی چڕ خراوەتە گەڕ بۆ ئەوەی بە زووترین كات هەردوو لایەن، پەكەكە و پارتی ئامادەیی نیشانبدەن بۆ دەستكردن بە گفتوگۆ بۆ كۆتاییهێنان بەو دۆخە ئاڵۆزەی ئەو سنوورەی گرتووەتەوە، چونكە دواجار هەر دەبێت بە دانیشتن و گفتوگۆ كیشە و ناكۆكییەكان چارەسەر بكرێن.

بەشی بکە لە
Previous Next
Close
Test Caption
Test Description goes like this