“29ى تشرینى دووه‌م، پرۆسه‌ى خوێندن له‌ هه‌رێمى كوردستان ده‌ستپێده‌كاته‌وه‌”

0
1392
قوتابخانه‌یه‌ك له‌ هه‌رێمى كوردستان | فۆتۆ: UNICEF

SNN – بڕیار محەمەد
جێگری سەرۆكی لیژنەی پەروەردە و خوێندنی باڵا و توێژینەوەی زانستی لە پەرلەمانی كوردستان رایدەگەیه‌نێت: وەستانی خوێندن تەنیا بۆ یەك مانگە، ده‌شڵێت: “لە 29ی تشرینى دووه‌م، پرۆسەی خوێندن دەستپێدەكاتەوە”.

موسلیم عه‌بدوڵا، جێگری سەرۆكی لیژنەی پەروەردە و خوێندنی باڵا و توێژینەوەی زانستی لە پەرلەمانی كوردستان بە SNNی راگەیاند: “دوای دەستپێكردنەوەی پرۆسەی خوێندن رۆژ لەدوای رۆژ رێژەی تووشبوون بەو ڤایرۆسى كۆرۆنا لە ناوەندەكانی خوێندن بەرزدەبوویەوە، بۆیە وەزارەتی پەروەردە بڕیاریداوە پرۆسەی خوێندن بۆ ماوەی یەك مانگ رابگرێت، بەپێی ئەو بەدواداچوونانەی ئێمە كردوومانە لە 29ی تشرینى یه‌كه‌م، پرۆسەی خوێندن لە هەرێمی كوردستان دەستپێدەكاتەوە”.

وتیشى: “ئێمە تێبینیمان لەسەر ئەو داتایە هەبوو كە وەزارەتی پەروەردە لەبارەی تووشبوون بە ڤایرۆسی كۆرۆنا لە ناوەندەكانی خوێندن بڵاویكرده‌وه‌، بەڵام نكۆڵیش لەوە ناكرێت كە ڤایرۆسەكە بوونی هەیە”.

جێگری سەرۆكی لیژنەی پەروەردە و خوێندنی باڵا و توێژینەوەی زانستی لە پەرلەمانی كوردستان ئه‌وه‌شى خسته‌ڕوو: “لە ماوەی دەستپێكردنەوەی پرۆسەی خوێندن لە زۆرینەی خوێندنگاكانی سنووری ڕانیە و سلێمانی مامۆستایان نەدەچوونە هۆڵەكانی خوێندن و بایكۆتیان راگەیاندبوو، ئێمەش دوامان لە وەزارەتی پەروەردە و خوێندنی باڵا كرد بۆ ئەوەی پرۆسەی خوێندن بەشێوەیەكی تەندروست بەڕێوەبچێت ئەو بڕه‌ پاره‌یه‌ى مانگانە دێتە بەردەستی وەزارەتی دارایی، مووچەی مامۆستایانی لێبدات بۆ ئەوەی مامۆستایان بە گڕوتینەوە و بەوپەڕی دڵسۆزیيەوە وانەكان بڵێنەوە”.

به‌ وته‌ى ئه‌و په‌رله‌مانتاره‌، “لەڕاستیدا ئەو سیستمەی ئێستا پەیڕەو دەكرێت كە سیستمی ئۆنڵاینە بە باشی نازانن، چونكە نە مامۆستا و نە خوێندكاریش شارەزایی باشیان لێ نيیە و دواتر خوێندن لەنێو پۆل نەبێت و مامۆستا و خوێندكار رووبەڕوو یەكتر لە نێو پۆل وانە نەخوێنن هیچ سوودێك نییە بۆ خوێند، بۆیە ئەو سیستمە باش و تەندروست نییە بۆ ئێستای كەرتی پەروەردە لە هەرێمی كوردستان”.

دوای ئەوەی لیژنەی باڵای رووبەڕووبوونەوەی ڤایرۆسی كۆرۆنا لە هەرێمی كوردستان كۆبوونەوە لەسەر راسپاردەی وەزارەتی تەندروستی بڕیاردرا بە راگرتنی دەوام لە سەرجەم ناوەندەكانی خوێندن بە حكومی و ئەهلیشەوە تاوه‌كو 1ى كانونى یه‌كه‌م.

بەشی بکە لە
Previous Next
Close
Test Caption
Test Description goes like this