“ئه‌وانه‌ى ده‌ڵێن: سه‌رۆك تره‌مپ ئاماده نییه ده‌سه‌ڵات راده‌ست بكات راستناكه‌ن”
كه‌یڵى ماكنه‌ینى، وته‌بێژى كۆشكى سپى ئه‌مریكا | فۆتۆ: Reuters
SNN
وته‌بێژى كۆشكى سپى ئه‌مریكا رایده‌گه‌یه‌نێت: ئه‌وانه‌ى ده‌ڵێن، سه‌رۆك تره‌مپ ئاماده نییه ده‌سه‌ڵات راده‌ست بكات راستناكه‌ن، ده‌شڵێت: “سه‌رۆك تره‌مپ هه‌رگیز كێشه‌ى دروستنه‌كردووه و ئه‌وه‌ى وتوویه‌تى له‌باره‌ى ساخته‌كارییه‌وه خواستى خه‌ڵكه”.
كه‌یڵى ماكنه‌ینى، وته‌بێژى كۆشكى سپى ئه‌مریكا ئه‌مڕۆ هه‌ینى له كۆنگره‌یه‌كى رۆژنامه‌وانیدا رایگه‌یاند: “زۆركات ئێمه ده‌بیستین كه ده‌ڵێن: سه‌رۆك تره‌مپ وتوویه‌تى: ده‌سه‌ڵات راده‌ستناكه‌م، به‌ڵام ئه‌مانه ته‌نیا قسه‌ى خه‌ڵكه و هیچ بنه‌مایه‌كى راستى نییه، من دوو ساڵه له كۆشكى سپى كارده‌كه‌م، ده‌زانم سه‌رۆك تره‌مپ چۆن بیرده‌كاته‌وه و لێره چى رووده‌دات، بۆیه ئه‌وانه ته‌نیا قسه‌ن”.
وته‌بێژى كۆشكى سپى وتیشى: “ئه‌و قسانه‌ى كه ده‌كرێن گوایه سه‌رۆك تره‌مپ كێشه‌ى دروستكردووه، هیچ بنه‌مایه‌كیان نییه، ئه‌وه‌ى ئه‌و ده‌یڵێت له‌باره‌ى ساخته‌كارییه‌وه سه‌رجه‌مى خواست و ویستى خه‌ڵكه، ئه‌وه خه‌ڵكه داوا ده‌كات لێكۆڵینه‌وه بكرێت، چونكه ساخته‌كارى كراوه”.
كه‌یڵى ماكنه‌ینى به‌شێكى ترى قسه‌كانى ته‌رخانكرد بۆ هێرشكردنه سه‌ر تیمى هه‌ڵبژاردنى جۆو بایدن، سه‌رۆكى هه‌ڵبژێردراوى ئه‌مریكا به شێوه‌یه‌كى ناڕاسته‌وخۆ و ئه‌وه‌شى خسته‌ڕوو: “سیخوڕى كراوه به‌سه‌ر تیمى هه‌ڵبژاردنى سه‌رۆك تره‌مپه‌وه، ئه‌وانه‌ى ئه‌و كاره‌یان كردووه قسه‌ى بێ بنه‌ماش بڵاوده‌كه‌نه‌وه”.
به وته‌ى وته‌بێژى كۆشكى سپى، “دۆناڵد تره‌مپ، براوه‌ى هه‌ڵبژاردنه‌كانه ئه‌گه‌ر لێكۆڵینه‌وه‌یه‌كى ورد بكرێت”.
پەرەپێدراوە و دروستکراوە