“پێویسته‌ حكومه‌تى هه‌رێم واز له‌ ستراتیژیه‌تى رێككەوتنی تەواوكاری بودجە بهێنێت”

0
202
دراوى 25 هه‌زار دینارى عێراق

SNN – عەلی حەمە سەعید
ئه‌ندامێكى ئه‌نجوومه‌نى نوێنه‌رانى عێراق رایده‌گه‌یه‌نێت: پێویسته‌ حكومەتی هەرێم كار بە ستراتیژیه‌تى رێككەوتنی تەواوكاری بودجە نەكات، ده‌شڵێت: “ئەو پارەیەی كە لە بودجەی گشتی عێراق بۆ هەرێم دیاریكراوە هه‌مووى نه‌نێردراوه‌”.

ڕێزان شێخ دلێر، ئەندامی ئەنجوومەنی نوێنەرانی عێراق لە فراكسیۆنی سه‌وز بە SNNی راگەیاند: “لە ساڵی 2019 و 2020 حكومەتی هەرێم كاری بە رێككەوتنی تەواوكاری بودجە كردووە لەگەڵ حكومەتی عێراق، بە جۆرێك ئەو پارەیەی كە لە بودجەی گشتی عێراق بۆ هەرێمه‌ و بە %12.67 دیاریكراوە هەمووی رەوانە نەكراوە، چونكە هەرێم پابەند نەبووە بە ناردنی نەوت، لە بەرامبەریشدا عێراق بودجەی تەواوكاری بۆ ناردووە كە بریتیبووە لە 320 ملیار دینار”.

وتیشى: “لە ئێستادا كە نزیكدەبینەوە لە بودجەی گشتی 2021 و رەوانەكردنی پرۆژەیاساكە بۆ پەرلەمان، پێویسته‌ حكومەتی هەرێم بەڕاستی پابەندی هەر جۆرە رێككەوتنێك بێت كه‌ دەیكات بۆ رادەستكردنی نەوت، دەبێت كۆتایی بە رێككەوتنی ناردنی بودجەی تەواوكاری بهێنێت، چونكە لای هەمووان ئاشكرایە كە ئەگەر حكومەتی هەرێم نەوتەكەی رادەستی عێراق بكات زۆر زیاتر لەو پارەیه‌ى دەستدەكەوێت كه‌ ئێستا خۆى له‌ فرۆشتنى نه‌وت ده‌ستیده‌كه‌وێت”.

ئەو ئەندامەی ئەنجوومەنی نوێنەرانی عێراق ئەوەشی خسته‌ڕوو: “چیتر پێویست ناكات حكومەتی هەرێم ئەوەندە سزای فەرمانبەرانی خۆی بدات، بەوەی رازیبێت كار بە بودجەی تەواوكاری بكات كه‌ لەلاین عێراقەوە بۆی رەوانە بكرێت، بۆیە دەبێت ئەو رێككەوتنەی واژوو دەكرێت بە ته‌واوەتی پێوەی پابەند بێت، ئەوكاتەش فەرمانبەران گرفتی دواكەوتن و دابەشنەكردنی مووچەیان نامێنێت و حكومەتی هەرێمیش گرفتی ئەوەی نابێت نرخی نەوت دادەبەزێت یاخود نا، بەڵكو ئەوەندەی لەسەر نەوت رادەستی سۆمۆ بكات و لە بەرامبەردا پارەی خۆی وەربگرێت”.

 

بەشی بکە لە
Previous Next
Close
Test Caption
Test Description goes like this