بۆ یەکەمجار زەردەچەوەی کوردستان دەخرێتە بازاڕەکانەوە

0
1461

SNN-عەلی حەمە سەعید
جوتیارە نموونەییەكەی پارێزگای هەڵەبجە بەرهەمی زەردەچەوەی ژاپۆن و هۆڵەندا و ئەڵمانیا لە كێڵگە تایبەتەكەی دەچێنێت و لە چوار سەلك زەردەچەوەوە بۆ دوو هەزار سەلك زیادیبكات، بە وتەی خۆشی ئەمساڵ بۆیەكەمجار زەردەچەوەی كوردستان دەخاتە بازاڕەوە و بەشی 300 جوتیاریشی ئامادەكردووە لە زەویەكانیان بچێنن.

ئازاد محەمەد، ناسراو بە جوتیارە نمونەییەكی كوردستان بە SNNی ڕاگەیاند: پێش چەند ساڵێك كاتێك سەردانی ژاپۆنو ئەڵمانیا و چەند وڵاتێكی دیكەی ئەوروپیم كرد توانیم تەنها چوار سەلك لە زەردەوە بهێنمەوە بۆ كوردستان و وەك ئەزمونێكیش لە زەوییە كشتوكاڵییەكی خۆم دەستم كرد بە چاندنی بەجۆرێك پلانێكم بۆ دانا كە ساڵی یەكەمی چاندنەكەی بڕیارمدا كە هیچ لە بەرهەمەكەیم كۆنەكەمەوە، بۆ ساڵی دووەم بەرهەمەکە زۆر زیادیكرد و دووبارە ڕوایەوە بەوەش توانیم سەركەوتێكی باشی تیادا تۆمار بكەم.

ئاماژەی بەوەشكرد، تۆوی زەردەچەوە لە شێوەی پەتاتە یاخود سێوی ژێرزەویدایە و بەم تاقیكردنەوەیە ئەوەم بۆ دەركەوت كە كەشوهەوا و خاكی كوردستان زۆر لەبارە بۆ چاندنی زەردەچەوە بۆیە لە ئێستادا لەو چوار سەلك زەردەچەوەیەی كە لە دەرەوە هاوردەم كرد لە ئێستادا زیاد لە دوو هەزار سەلك زەردەچەوەم هەیە كە لەباشترین جۆری زەردەچەوەیە و پلانیشم هەیە بۆ ئەمساڵ بۆ یەكەمجار زەردەچەوەی كوردستان بخەمە بازاڕەوە.

ئەو جوتیارە نمونەییە ئەوەشی خستەڕوو، ئەو زەوییەی كە بۆ چاندنی زەردەچەوە لەبارە دەبێت قوڕی كەمبێت و مادەی لمی زۆرتربێت و وەك قوم بێت چونكە زەردەچەوەش هاوشێوەی بەرهەمی پەتاتە و زەنجەفیل و سێوی ژێرزەوی حەزیان بە زەوییەكە قوڕی كەمبێت و قومێكی شل بێت، بۆیە بڕوام بەخۆم هەیە كە بتوانم لە چەند ساڵی داهاتوودا زیاتر گرنگی بەم جۆرە بەرهەمانە بدەم تا ئاستی ئەوەی هەناردەی دەرەوەشیان بكەین بۆ ئەو مەبەستەش هەر جوتیارێك بیەوێت كارێكی لەو شێوەیە بكات من ئامادەی هاوکاریكردنیم هەر لە ئێستاوە بەشی 300 جوتیار زەردەچەوە ئامادەكردووە بۆ ئەوەی لە زەوییەكانیاندا بیچێنن ئەگەر بیانەوێت.

 
بەشی بکە لە
Previous Next
Close
Test Caption
Test Description goes like this