“ده‌رگاى ناوەندەكانی خوێندن له‌ هه‌رێم تاوه‌كو 4 هەفتەی دیكە ناكرێته‌وه‌”

0
2056

SNN – عەلی حەمە سەعید
بەرپرسێكی باڵای وەزارەتی تەندروستيی حكومەتی هەرێم رایده‌گه‌یه‌نێت: بەهۆی بەردەوامی مەترسی بڵاوبوونەوەی ڤایرۆسی كۆرۆنا و بە مەبەستی زیاتر كۆنترۆڵكردنی دۆخەكە، بڕیاردەدەین بۆ ماوەی چوار هەفتەی دیكە دەرگای ناوەندەكانی خوێندن بەداخراوی بمێنێتەوە، ده‌شڵێت: “بڕیارەكە سەرجەم ناوەندەكانی خوێندن دەگرێتەوە بە زانكۆ و پەیمانگاكانیشەوە”.

د. خاڵس قادر، بەڕێوەبەری گشتی دیوان لە وەزارەتی تەندروستيی حكومه‌تى هه‌رێم ئه‌مڕۆ شه‌ممه‌ بە SNNی راگەیاند: “بەهۆی ئەو ئەزموونانەی كە هەمانە جاریكی دیكە رێگەنادەین بە كردنەوەی دەرگای ناوەندەكانی خوێندن، چونكه‌ رێژەی تووشبوون و مردن بە كۆرۆنا زیاد ده‌كات، هاوكات بە گوێرەی ئەو هەڵسەنگاندنانەی كە كردومانە ئەوە دەخەنه‌ڕوو، هێشتا بڵاوبوونەوەی ڤایرۆسی كۆرۆنا لە دۆخێكی مەترسیداردایە و جێگای متمانە نییە”.

وتیشى: “لە دوو رۆژی داهاتوودا راپۆرتی خۆمان ده‌خه‌ینه‌ڕوو و ئاراستەی لیژنەی باڵای رووبەڕووبوونەوەی كۆرۆنای دەكەین بە مەبەستی كردنەوە یاخود بەردەوامی داخستنی دەرگای ناوەندەكانی خوێندن”.

بەڕێوەبەری گشتی دیوان لە وەزارەتی تەندروستی ئه‌وه‌شى خسته‌ڕوو: “ئەوەی ئێمە ئامادەمان كردووە ئەوەیە، هێشتا مەترسییەكانی بڵاوبوونەوەی كۆرۆنا لە ئارادان و پێویستە دەرگای ناوەندەكانی خوێندن بۆ ماوەی مانگێكی دیكە بە داخراوی بمێننەوە”.

ئەو بەرپرسەی وەزارەتی تەندروستی ئەوەشی خستەڕوو: “ئەمجارە داخستنی ناوەندەكانی خوێندن تەنها قۆناغی بنەڕەتی و ئامادەیی ناگرێتەوە بەڵكو راپۆرتەكەمان گشتگیرە و زانكۆ و پەیمانگاكانیش دەگرێتەوە، پێویستە بۆماوەی مانگێكی دیكە دەرگای ناوەندەكانی خوێندن بە داخراوی بمێنێته‌وه‌”.

قسه‌كانى ئه‌و به‌رپرسه‌ى وه‌زاره‌تى ته‌ندروستى له‌كاتێكدایه‌ كه‌ رۆژى یه‌كى كانونى یه‌كه‌م، لیژنه‌ى باڵاى رووبه‌ڕووبوونه‌وه‌ى ڤایرۆسى كۆرۆناى حكومه‌تى هه‌رێم كۆده‌بێته‌وه‌، تێیدا بڕیارى كۆتایی له‌سه‌ر داهاتووى پرۆسه‌ى خوێندن له‌ هه‌رێمى كوردستان و رێكارى نوێى رووبه‌ڕووبوونه‌وه‌ى كۆرۆنا ده‌درێت.

بەشی بکە لە
Previous Next
Close
Test Caption
Test Description goes like this