لە چەند رۆژی داهاتوودا بەردی بناغەی كارگەی شەكر لە سنووری ڕاپەڕین دادەندرێت

SNN- بڕیار محەمەد 

وتەبێژی وەزارەتی كشتوكاڵ و سەرچاوەكانی ئاوی حكومەتی هەرێمی كوردستان ئاشكرایدەكات “لە  چەند رۆژی داهاتوو بەردی بناغەی كارگەی شەكر لە سنووری ئیدارەی ڕاپەڕین دادەندرێت، كارگەكەش  چەوەندەر دەكات بە شەكر و هاوكارێکی باش دەبێت بۆ ساغكردنەوەی بەرهەمی جووتیاران لەو سنوورە” .

حوسێن حەمەكەریم وتەبێژی وەزارەتی كشتوكاڵ و سەرچاوەكانی ئاوی حكومەتی هەرێمی كوردستان  بە SNNی راگەیاند: بڕیارە لە سەرەتای مانگی 12ی ئەمساڵ  بەردی بناغەی كارگەی شەكر لە سنووری ئیدارەی ڕاپەڕین دابنرێت، کە دانانی ئەو كارگەیەش لەو سنوورە دوای سەردانی تیمەكانی ئێمە و هەڵسەنگاندنی شوێنەكە بووە کە زۆرینەی زەوییەكانی بۆ بەرهەمی چەوەندەر و شەكر تەرخانكراوە .

وتیشی: “ئەو كارگەیە چەوەندەر دەكاتە شەكر و لەگەڵ تەواو بوونیشی دەست بە گرێبەستكردن دەكرێـت لەگەڵ ‌جووتیارانی ئەو سنوورە و لەگەڵ ئەوەی ئەو كارگەیە هاوكار دەبێت بۆ زیادكردنی بەرهەمی شەكری خۆماڵی، لەلایەكی تریشەوە هاوكارێكی باش دەبێت بۆ ساغكردنەوەی بەرهەمی جووتیاران لەو سنوورە و  پاڵپشتێكی باشیش دەبێت بۆ هاندانی جووتیارانی دیكە”.

لەگەڵ دەستبەكاربوونی كابینەی نۆیەمی حكومەتی هەرێمی كوردستان رۆژ لە دوای رۆژ پەرە بە كەرتی كشتوكاڵ دەدرێت و لە ماوەی رابردووش بە هەوڵی سەرۆكی حكومەت و جێگری سەرۆكی حكومەت چەندین كارگەی نوێ لە بواری كشتوكاڵ كراونەتەوە و چەندانی دیكەش نۆژەنكراونەتەوە لە سنووری هەرێمی كوردستان بە گشتی و سنووری پارێزگای سلێمانی بە تایبەتی .