یه‌كێتى و گۆڕان: پێویسته‌ به‌په‌له‌ شاندێکی هەرێم کە “بڕیار بەدەست” بێت بچێته‌ به‌غدا

SNN

پاش كۆتایی هاتنى كۆبوونه‌وه‌ى وه‌فدى باڵاى یه‌كێتیی نیشتمانیی كوردستان و بزووتنه‌وه‌ى گۆڕان راگه‌یه‌نراوێكیان بڵاوكرده‌وه‌ و رایانگه‌یاند: پێویسته‌ بەپەلە وەفدێکی خاوەن بڕیاری حکومەتی ھەرێم پێکبھێنرێت و بچێتە بەغدا.

له‌ راگه‌یه‌نراوه‌كه‌دا كه‌ كه‌مێك له‌مه‌وبه‌ر بڵاوكراوه‌ته‌وه‌ هاتووه‌، “پێویسته‌ بەپەلە وەفدێکی خاوەن بڕیاری حکومەتی ھەرێم پێکبھێنرێت و بچێتە بەغدا بۆ گفتوگۆکردن لەسەر چارەسەرکردنی ریشەیی و کۆتایی کێشەی بودجە و مووچەی ھەرێمی کوردستان، لەھەمانکاتدا ئەم ھەنگاوە ببێتە بناغەیەکی پتەو بۆ یاسای بودجەی 2021 فیدڕاڵی”.

ده‌قى راگه‌یه‌نراوه‌كه‌

ئەمڕۆ یەکشەمە ٢٩/١١/٢٠٢٠ کۆبوونەوەی لوتکەی یەکێتیی نیشتمانیی کوردستان و بزووتنەوەی گۆڕان لەدەباشان بەڕێوەچوو .
تەوەری سەرەکی کۆبوونەوەکە گفتوگۆکردن بوو ، لەسەر دواین گۆڕانکاری و پێشھاتە سیاسی و ئابوورییەکانی ھەرێم و عێراق ، بەتایبەت خراپی بژێوی ژیانی ھاووڵاتیيان و مووچەخۆرانی ھەرێم ، کە بەرئەنجامی قەیرانی دارایی و بڵاوبوونەوەی ڤایرۆسی کۆرۆنا دروست بووە ، دواتریش بەدیارکراوی دوای دەرکردنی یاسای ئەنجوومەنی نوێنەرانی عێراق، پەیوەندیدار بە کورتھێنانی بودجە و وەرگرتنی قەرز قەیرانەکە قوڵتربووەتەوە .

سەڕەڕای جەختکردنەوە، لە تووندوتۆڵکردنی پەیوەندی نێوان ھەردوولا، بەپێویست زانرا ھەنگاوی کرداری خێرا بۆ چارەسەرکردنی کێشەکان بنرێت، ھەروەک ھاوڕابووین لەسەر ئەم ھەنگاو و بڕیارانەی خوارەوە.

1. بەپەلە وەفدێکی خاوەن بڕیاری حکومەتی ھەرێم پێکبھێنرێت و بچێتە بەغدا بۆ گفتوگۆکردن لەسەر چارەسەرکردنی ریشەیی و کۆتایی کێشەی بودجە و مووچەی ھەرێمی کوردستان، لە ھەمانکاتدا ئەم ھەنگاوە ببێتە بناغەیەکی پتەو بۆ یاسای بودجەی 2021 فیدڕاڵی.

2. پێشوازی لە ھەنگاوەکانی بەرەوپێشچوونی سیستمی لامەرکەزی کارگێڕی و دارایی دەکەین، ھەروەک لەکارنامەی کابینەی نۆیەمی حکومەتی ھەرێمدا ھاتووە.

3. زەمینەخۆشکردن بۆ کۆبوونەوەی لایەنە سیاسیەکانی کوردستان و پەرەپێدانی پەیوەندییەکان بە مەبەستی چارەسەرکردنی ئەو کێشانەی رووبەڕووی واقیعی ھەرێم و عێراق دەبێتەوە.