بەبێ‌ وەرگرتنی گومرگ ڕێگە بەهیچ ئۆتۆمبێلێكی بارهەڵگری توركی نادرێت لە باشماخەوە بێنە هەرێم

0
379
مەرزی باشماخ له‌ قه‌زاى پێنجوێن | فۆتۆ: عه‌لى حه‌مه‌ سه‌عید/ SNN

SNN-عەلی حەمە سەعید

سەرپەرشتیاری مەرزی نێودەوڵەتی باشماخ ئاماژە بەوەدەكات هەڵمەتێكی چڕوپڕی بێبنەما لەسەر مەرزی باشماخ دەستپێكردووە بۆ ناشیرینكردنی كارەكانمان، لەكاتێكدا چەندین لیژنەی حكومی و پەرلەمانی بە شیوەی مەیدانی هاتوونەتە لامان و هیچ ڕەخنەیەكیان نەبووە لەكارەكانمان، دەشڵێت بەبێ‌ وەرگرتنی گومرگ ڕێگە بە هیچ بارهەڵگری توركی نادرێت بێتە ناو خاكی هەرێم.

لیوا مەریوان شێخ كەمال، سەرپەرشتیاری مەرزی نێودەوڵەتی باشماخ بە SNNی ڕاگەیاند: تا ئێستا چەندین لیژنە لە وەزارەتی ناوخۆ پەرلەمان خودی وەزیری دارایی و چەندین لیژنەی دیكەی لاوەكی سەردانی مەرزی نێودەوڵەتی باشماخیان كردووە بۆ لێكۆڵینەوە لەبارەی چۆنیەتی بەڕێوەچوونی ئیش و كارەكانمان ئەو لیژنانەش هەر پرسیارو سەرنجێكیان هەبووبێت ئێمە بە ڕاشكاوانە وەڵاممان داونەتەوە، بەڵام هەستدەكەین هەڵمەتێكی چڕ بۆ ناشیرینكردنی ئیش و كارەكانی مەرزی باشماخ بەردەوامی هەیە ئەمەش وا لە ئێمە ناكات چۆن لەڕابردوو كارمان كردووە ساردمان بكاتەوە.

ئاماژەی بەوەشكرد، لەناو مەرزی باشماخ 22 فەرمانگە و دامەزراوەی تایبەت هەن كە هەریەكەیان تایبەتمەدی خۆی هەیە و لە بواری دیاریكراودا كاردەكات، بۆیە ئەوەی دەوترێت كە گوایە ئۆتۆمبێلی بارهەڵگری توركی لە مەرزی باشماخەوە دێنە هەرێمی كوردستان و گومرگ ناكرێن یاخود كاڵا و شمەكی نایاسایی هاوردە دەكەن، ئەوە پەیوەندی بە بەڕیوەبەرایەتی گومرگەوە هەیە چونكە تا ئێستا لەلایەن بەڕێوەبەرایەتی گومرگی باشماخەوە بە نوسراو یان بەزارەكی منیان ئاگادار نەكردووەتەوە كە ڕۆژێك لە ڕۆژان ئۆتۆمبێلێك هاتبێتە هەرێم گومرگ نەكرابێت یاخود باری قاچاغی هێنا بێت كە ئەوە ئەركی ئەوانە ئێمە ئاگاداربكەن.

سەرپەرشتیاری مەرزی نێودەوڵەتی باشماخ ئەوەشی خستەڕوو، هەر لەناو مەرزی باشماخ بەڕێوەبەرایەتی پۆلیسی گومرگ و هەروەها گومرگی شارستانیش هەیە، ئەو قسەو قسەڵۆكانەی كە باس لە كاری نایاسایی دەكرێت كە گوایە لە مەرزی باشماخ ئەنجام دەدرێت دەبێت لەلایەن ئەوانەوە ڕێگری لێبكرێت، بۆیە تا ئێستا نە لەلایەن پۆلیسی گومرگ و نە لەلایەن گومرگی شارستانییەوە نە زارەكی نە بەنوسراو هیچ حاڵەتێكی كاری نایاساییان بە من نەگەیاندووە بۆ ئەوەی منیش دەستبەلێكۆڵینەوە و ڕێكاری یاسایی بكەم.

SNN بۆ وەرگرتنی زانیاری زیاتر لەسەر ئەم بابەتە و بۆچوونی بەڕێوەبەرایەتی گومرگ پەیوەندی بە (شاخەوان بەكر) بەڕێوەبەری مەرزی نێودەوڵتی باشماخەوە كرد بەڵام ناوبراو ئامادەنەبوو هیچ لێدوانێك لەوبارەیەوە بدات و تەنها ئەوەندەی وت ” ئامادەنیم لەسەر ئەوبابەتە هیچ لێدوانێك بدەم و هیچ وەڵامێكیشم بۆ هیچ لایەنێك هەبێت، چونكە هەندێك شت هەیە بە مەبەست دەخرێنە سەر مەرزی باشماخ”.

وتەكانی ئەو بەرپرسانەی مەرزی باشماخ لەكاتێكدایە كە لە هەندێك لە ڕاگەیاندنەكانەوە باس لەوە كراوە كە گوایە بەهۆی ئەوەی لە مەرزی باشماخ گومرگ لە ئۆتۆمبێلە بارهەڵگرە توركییەكان وەرناگیرێت لەبری ئەوەی بارەكانیان لە مەرزی ئیبراهیم خەلیلەوە هاوردەی هەرێم بكەن دێن لە باشماخەوە بارەكانیان دێننە هەرێمی كوردستان.

بەشی بکە لە
Previous Next
Close
Test Caption
Test Description goes like this