وەزارەتی كشتوكاڵ قه‌ده‌غه‌ى هاورده‌كردنى هه‌نارى درێژكرده‌وه‌

0
87

SNN – عەلی حەمە سەعید
وتەبێژی وەزارەتی كشتوكاڵ و سەرچاوەكانی ئاوی حكومەتی هەرێم رایده‌گه‌یه‌نێت: لەگەڵ ئەوەی پێشتر بڕیارماندابوو، تاوەكو ناوەڕاستی ئەم مانگە قه‌ده‌غه‌ى هاوردەكردنی بەرهەمی هەنار لەدەرەوە بەردەوام بێت، بەڵام بەهۆی ئەوەی هێشتا بڕێكی زۆری هەنار لە ساردكەرەوەكاندا ماوەن بۆیە بڕیارماندا تاوه‌كو كاتێكى نادیار هاورده‌كردنى هه‌نار رابگرین.

حسێن حەمە كەریم، وتەبێژی وەزارەتی كشتوكاڵ و سەرچاوەكانی ئاوی حكومەتی هەرێم بە SNNی راگەیاند: “ئێمە ساڵانە لەكاتی وەرزی پێگەیشتنی بەرهەمە ناوخۆییەكاندا بڕیاری قەدەغەى هاورده‌كردنى ئه‌و به‌رهه‌مانه‌ دەردەكەین تا ئەوكاتەی بەرهەمی جوتیارانی هەرێم ساغدەبێتەوە، هەر لەو چوارچێوەیەشدا ئەمساڵ لە ناوەڕاستی مانگی هەشت بڕیارماندا كە تاوه‌كو ناوەڕاستی مانگی 12 هاوردەكردنی بەرهەمی هەنار قەدەغەبكەین ئەوەش وەك پاڵپشتییەك بۆ بەرهەمی ناوخۆیی”.

وتیشى: “لە ئێستادا كە چەند رۆژێكی كەمی ماوە بۆ ئەو وادەیە، بەڵام لەسەر داوای ئەو خاوەن ساردكەرەوانەی بەرهەمی ناوخۆیی هەناریان لە جوتیاران كڕیووە و هەڵیانگرتووە، بڕیارماندا بە بەردەوامیدان بە قەدەغەكردنی هاوردەی هەنار، تا ئەوكاتەی بەرهەمی ناوخۆییمان تەواو دەبێت، ئەوەش بەرەچاوكردنی خواست و خستنەبازاڕ، هۆكاری دەركردنی ئەو بڕیارەش بۆ پاڵپشتیكردنی جوتیارانی ناوخۆییە”.

وتەبێژەكەی وەزارەتی كشتوكاڵ ئەوەشی خستەڕوو، ئێمە لە وەزارەتی كشتوكاڵ هەمیشە لە هەوڵی پاڵشتی و ڕەخساندنی دەرفەتی زیاتر بۆ ئەو جوتیارانەی بەرهەمی هەناریان هەیە هەرچی لە بەرژەوەندی ئەواندا بێت ئەنجامی دەدەین بەڵام لە پاڵ ئەوەشدا ناهێڵین گرانفرۆشی لە بەرهەمە ناوخۆییەكان سەرهەڵبدات و باری سەرشانی هاووڵاتیيانیش قورستر بكات.

بەشی بکە لە
Previous Next
Close
Test Caption
Test Description goes like this