ژماره‌یه‌ك عه‌ره‌بى هاورده داواى چۆڵكردنى گوندى په‌ڵكانه ده‌كه‌ن
گوندی په‌ڵكانه له‌ناحیه‌ی سه‌رگه‌ڕانی قه‌زای دوبز | فۆتۆ: Kirkuknow
SNN – سیروان حه‌سه‌ن
له سنوورى كه‌ركوك ژماره‌یه‌ك عه‌ره‌بى هاورده كه نزیكه‌ى 200 كه‌س ده‌بن به هاوكارى هێزێكى عێراقى چوونه‌ته سه‌ر گوندى په‌ڵكانه و داوا له هاووڵاتییه كورده‌كان ده‌كه‌ن گونده‌كه‌یان بۆ چۆڵبكه‌ن.
حاجى فاخر، دانیشتووى گوندى په‌ڵكانه به SNNى راگه‌یاند: “له‌ئێستادا نزیكه‌ى 200 كه‌س له عه‌ره‌بى هاورده به هاوكارى هێزێكى عێراقى هاتوونه‌ته نێو گوندى په‌ڵكانه له سنوورى قه‌زاى دووبز و داوا ده‌كه‌ن هاووڵاتییانى كوردى ناوچه‌كه گونده‌كه چۆڵبكه‌ن”.
وتیشى: “وه‌كو هاووڵاتییانى كوردى گونده‌كه كه نزیكه‌ى 55 خێزانین كۆبووینه‌ته‌وه و له به‌رامبه‌ر ئه‌و عه‌ره‌بانه وه‌ستاوینه‌ته‌وه كه ئه‌مه چه‌ندینجاره هه‌ڵده‌كوتنه سه‌ر گونده‌كه‌مان له كاتێكدا ئه‌و گونده كوردییه و له‌وه‌ته‌ى هه‌یه كوردى تێدا ژیاوه و له باوباپیرانه‌وه زه‌وییه‌كانمان بۆ ماوه‌ته‌وه”.
حاجى فاخر ئه‌وه‌شى خسته‌ڕوو: “تا ئێستا هیچ شه‌ڕ و پێكدادانێك دروستنه‌بووه و بڕیاره سه‌عد حه‌ربى، فه‌رمانده‌ى هێزه هاوبه‌شه‌كانى كه‌ركوك كه‌مێكى تر بگاته ناوچه‌كه بۆ گفتوگۆ كردن و چاره‌سه‌رى ئه‌و كێشه‌یه”.
گوندى په‌ڵكانه سه‌ربه قه‌زاى دوبزه له سنوورى كه‌ركووك، ناوچه‌یه‌كى كوردستانییه و له سه‌رده‌مى به‌عس له چوارچێوه‌ى پرۆسه‌ى ته‌عریب كورده‌كان ده‌ركران و عه‌ره‌بى هاورده له شوێنیان نیشته‌جێ بوون، دواى ساڵى 2003 كورده‌كان جارێكى تر گه‌ڕانه‌وه سه‌ر زێدى خۆیان.
