ئەمریکا سزا بەسەر تورکیادا دەسەپێنێت

SNN

بە گوێرەی چەند بەرپرسێکی ئەمریکا، ئیدارەی ترەمپ پلانی هەیە سزا بەسەر تورکیدا بسەپێنێت لەپێناو بەدەستهێنانی سیستەمی مووشەکی رووسی و پشتگوێخستنی هۆشدارییەکانی ئەمریکا لەوبارەیەوە.

ئاژانسی هەواڵی رۆیتەرز لە زاری دوو سەرچاوەوە بڵاویکردووەتەوە، لە ئایندەیەکی زۆر نزیکدا ئەمریکا سزا بەسەر تورکیادا دەسەپێنێت و دۆناڵد ترەمپ واژووی لەسەر سەپاندنی سزاکە بەسەر ئەنقەرەدا کردووە.

لە سەروبەندی بڵاوبوونەوەی ئەو هەواڵە لە میدیاکاندا، بەهای لیرەی تورکی بە رێژەی 1.4% دابەزی، شرۆڤەکارانیش پێیان وایە سزاکە ئابووری تورکیا لاوازتر دەکات لەکاتێکدا کە ئابووری وڵاتەکە بەهۆی بڵاوبوونەوەی ڤایرۆسی کۆرۆناوە زیانی زۆری پێگەیشتووە. هاوکات ناکۆکییەکانی نێوان واشنتن و ئەنقەرە ئاڵۆزتر دەکات.

ئەمەش دوای ئەوەدێت، ئەمڕۆ یەکێتی ئەوروپا سزای بەسەر ژمارەیەک بەرپرسی تورکیادا سەپاند کە دەستیان هەبوو لە دەرهێنانی غاز لە دەریای ناوەڕاستدا.