زیانی خۆپیشاندانەکانی رۆژانی رابردوو سەدان ملیۆن دینارە

0
169

SNN-عەلی حەمە سەعید

بەهۆی ئەو خۆپیشاندانانەی كە لەچەند ڕۆژی ڕابردوو لە سنووری پارێزگای هەڵەبجە و قەزاكانی سەیدسادق و قەزای شارەزوور پێنجوێن بەڕێوەچوون زیانی سەدان ملیۆن دیناریان بەبارەگا حزبی و حكومییەكانی سنوورەكە گەیاندووە.

زانا ڕەحمان، قایمقامی قەزای پێنجوێن بە SNNی ڕاگەیاند: لە سنوورەكەی ئێمەشدا هاوشێوەی زۆرێك لە شاروشارۆچكەكان خۆپیشاندانی ناڕەزایەتی بەڕێوەچوون كە بەهۆی ئەو خۆپیشاندانانەوە بارەگای سەرجەم حزبە سیاسییەكان سوتاون لەگەڵ ئەوەشدا هەر بەهۆی خۆپیشاندانەكانەوە ماڵی سەرپەرشتیاری مرزی باشماخ و ماڵێكی تایبەت بە مانەوەی قایمقام لەناو پێنجوێن ئەوانیش سوتێندراون و بەڵام تا ئەو كاتەی بارودۆخەكە بەتەواوەتی ئارام دەبێتەوە پاشان خەمڵاندن بۆ زەرەرو زیانەكان دەكەیم بە شیوەیەی ورد.

ئاماژەی بەوەشكرد، هەر بەهۆی خۆپیشاندانەكانەوە لە ناوقەزای پێنجوێن كەسێك كە پاسەوانی یەكێك لە بارەگا حزبییەكان بوو گیان لەدەستداوە و لەگەڵ ئەوەشدا پێنج هاووڵاتی دیكەش كە خۆپیشاندەر بوون بریندار بوون لە ئێستادا دۆخە تەواو ئارام بووەتەوە و هیچ ئاڵۆزییەك لە ئاردا نییە.

تەها ئەحمەد، لێپرسراوی بە شی راگەیاندن لە قایمقامێتی قەزای سەیدسادق بە SNNی ڕاگەیاند: لە ئیستادا بارودۆخی ئەمنی قەزای سەیدسادق ئارامە و هیچ جۆرە جموجوڵێكی نائاسایی بەدیناكرێت، هاوكات لەگەڵ ئەوەی هێشتا ئامارێكی وردمان لەبەردەستدا نییە لەبارەی زەرەووزیانەكانی ئەو خۆپیشاندانانەی بەڕێوەچوون بەڵام بە دڵنیاییەوە زیانی سەدان ملیۆن دینار بە بارەگا حزبی و حكومییەکانی سنوورەكە گەیشتووە بەتایبەت بینای قایمقامێتی قەزای سەیەدسادق كە هیچ كەرەستیەكی تیادا نەماوە بە كەڵكی بەكارهێنان بێت.

ئاماژەی بەوەشكرد، ئەو بارەگایانەی كە سوتێندراون بریتین لە بینای قایمقامێتی سەیدسادق ماڵی قایمقامی سەیدسادق فەرمانگەی كارەبای سەیدسادق بینای باج و دەرامەتی خانووبەرە دوو بینای كۆمیتەی یەكێتیی نیشتمانیی كوردستان بینای ناوچەی پارتی دیموكراتی كوردستان مەكۆی بزوتنەوەی گۆڕان بینای مەڵبەندی یەكگرتووی ئیسلامی بینای مەڵبەندی كۆمەڵی ئیسلامی بینای حزبی شیوعی.

لە سنووری پارێزگای هەڵەبجەش بە دیاریكراوی لە ناحییەی خورماڵ، خۆپیشاندەران هێرشیان كردە سەر بینای هاتووچۆ بەڕێوەبەرایەتی ناحییە بنكەی پاسەوانی سنوور بارەگای یەكگرتوو كۆمیتەی یەكێتی بارەگای كۆمەڵی ئیسلامی مەڵبەندی بزوتنەوەی ئیسلامی ناوچەی پارتی دیموكراتی كورستان، بەڵام هیچ كەسێك گیانی لەدەستنەدا تەنها دوو خۆپیشاندەر بەهۆی دووكەڵی بینا سوتاوەكانەوە باری تەندروستیان تێكچوو دواتر ڕەوانەی نەخۆشخانە كران لەوێش زیانی سەدان ملیۆن دینار زیانیان بە بارەگا حكومی و حزبییەكان گەیاند.

لە قەزای شارەزوور و ناحییەی وارماواش هاوشێوەی قەزای سەیدسادق و پێنجوێن و ناحییەی خورماڵ خۆپیشاندەران هێرشیان كردە سەر زۆربەی بارەگا حزبییەكان جگە لەوەی بە سەدان ملیۆن دینار زیانیان گەیاند بەو بارەگایانە لە هەمان كاتیشدا زیاد لە 20 خۆپیشاندەر بریندار بوون.

جیاواز لە هێرشكردنە سەر بارەگا حكومی و حزبییەكان، خۆپیشاندەران هێرشیان بۆسەر ماڵی تایبەتی قایمقامی سەیدسادقیش ئەنجامدا و بەوهۆیەوە لە ماڵی قایمقامی سەیدسادق بڕی 25 مسقاڵ ئاڵتوون و بڕی ملیۆنێك و 15 هەزار دینار پارە لەلایەن خۆپیشاندەرانەوە براوە ئەوە سەرەڕای ئەوەی كە بە بڕی 90 هەزار دۆلار زیان بە ماڵی قایمقام گەیەندراوە.

بە شێوەیەكی گشتی بەهۆی خۆپیشاندانەكانی قەزای سەیدسادق شارەزوور پێنجوێن ناحییەی خورماڵ و وارماوە چەندین کوژراو بریندار هەبوون، ئەوە سەرەڕای ئەوەی بەسەدان ملیۆن دینار زیان گەیەندراوە بە بینا حكومی و حزبییەكانی سنورەكە.

بەشی بکە لە
Previous Next
Close
Test Caption
Test Description goes like this