وه‌زاره‌تى ته‌ندروستیى هه‌رێم: هێشتا دڵنیانین و ترسمان‌ له‌ كۆرۆنا هه‌یه

0
321

SNN – بڕیار محه‌مه‌د
وته‌بێژى وه‌زاره‌تى ته‌ندروستيى حكومه‌تى هه‌رێمى كوردستان رایده‌گه‌یه‌نێت: نه‌گه‌یشتووینه‌ته‌ قۆناغێكى دڵنیا له‌ رووبه‌ڕووبوونه‌وه‌ى كۆرۆنادا، ده‌شڵێت: “هۆكارى كه‌مبوونه‌وه‌ى رێژه‌ى تووشبوون به‌ كۆرۆنا له‌ هه‌رێمى كوردستان بۆ پابه‌ندبوونى هاووڵاتییان ده‌گه‌ڕێته‌وه‌”.

ئه‌مڕۆ دووشه‌ممه‌ ئاسۆ حه‌وێزى، وته‌بێژى وه‌زاره‌تى ته‌ندروستیی حكومه‌تى هه‌رێم به‌ SNNى راگه‌یاند: “به‌ به‌راورد به‌ مانگى رابردوو رێژه‌ى تووشبوون به‌ ڤایرۆسى كۆرۆنا له‌ سه‌رتاسه‌رى هه‌رێمى كوردستان به‌شێوه‌یه‌كى به‌رچاو كه‌میكردووه‌”.

وتیشى: “هۆكارى كه‌مبوونه‌وه‌ى ئه‌م رێژه‌یه‌ بۆ پابه‌ندبوونى هاووڵاتییان به‌ رێكاره‌كانى رووبه‌ڕووبوونه‌وه‌ى كۆرۆنا و داخستنى ده‌رگاى قوتابخانه‌كان ده‌گه‌ڕێته‌وه‌، بۆیه‌ داوا له‌ هاووڵاتییان ده‌كه‌ین پابه‌ندبن به‌ رێنماییه‌كانه‌وه‌ بۆ ئه‌وه‌ى بتوانین به‌ته‌واوه‌تى به‌سه‌ر كۆرۆنادا زاڵبین”.

وته‌بێژى وه‌زاره‌تى ته‌ندروستى حكومه‌تى هه‌رێمى كوردستان له‌باره‌ى په‌سه‌ندكردنى رێكارى نوێ بۆ رووبه‌ڕووبوونه‌وه‌ى كۆرۆنا و گرتنه‌به‌ریان له‌ هه‌رێمى كوردستان، ئه‌وه‌شى خسته‌ڕوو: “بۆ گرتنه‌به‌رى هه‌ر رێكارێكى نوێ پێویسته‌ دوو هه‌فته‌ چاوه‌ڕێبكه‌ین، بۆ ئه‌وه‌ى بزانین ئه‌نجامه‌كه‌ى باشه‌ باخود نا، به‌ڵام به‌پێى ئه‌و ئه‌زموونه‌ى كه‌ له‌گه‌ڵ رێكاره‌ په‌یڕه‌وكراوه‌كان هه‌مانبوو، ئه‌و رێكارانه‌ سه‌ركه‌وتوو بوون”.

له‌ كۆتایی قسه‌كانیدا ئاسۆ حه‌وێزى ئاشكراشیكرد: “تا ئێستاش ئێمه‌ له‌ هه‌رێمى كوردستان نه‌گه‌یشتووينه‌ته‌ قۆناغێكى دڵنیاكه‌ره‌وه‌، هێشتاش ترسمان هه‌یه‌ له‌ ڤایرۆسه‌كه‌”.

بەشی بکە لە
Previous Next
Close
Test Caption
Test Description goes like this