پرۆسه‌ى خوێندن لە وەرزی یەكەمەوە دەستپێدەكات یان وەرزی دووەم؟

0
264
كۆمه‌ڵێك قوتابى له‌ یه‌كێك له‌ قوتابخانه‌كانى پارێزگاى هه‌ڵه‌بجه‌ | فۆتۆ: SNN

SNN – عەلی حەمەسەعید
سەرۆكی یەكێتیی مامۆستایانيی كوردستان رایده‌گه‌یه‌نێت: خوێندن بەشێوەی ئەلیكترۆنی بەردەوامە و ئەگەر وەزارەتی پەروەردە ئه‌و جۆره‌ خوێندنە پەسەندبكات ئەوا خوێندنی ناو پۆل لە وەرزی دووەمەوە دەستپێدەكات.

ئەحمەد گەرمیانی، سەرۆكی یەكێتیی مامۆستایانیی كوردستان بە SNNی راگەیاند: “ئەوەی تا ئێستا یەكلاییبووەتەوە ئەوەیە، بڕیارە لە 10ى كانونى دووه‌م، پرۆسەی خوێندن لە ناوەندەكانی خوێندن لەسەرتاسەری هەرێمی كوردستان دەستپێبكاتەوە، بەڵام ئەم بڕیارەش جارێكی دیكە قابیلی ئەوەیه‌ لەلایەن لیژنەی باڵای رووبەڕووبوونەوەی كۆرۆناوە گۆڕانكاری بەسەردا بێت بە درێژكردنەوەی داخستنی ناوەندەكانی خوێندن یاخود كردنەوەیان لەو وادەیەدا، بەڵام لە هەموو حاڵەتەكاندا خەمخۆرانی پەروەردە و وەزارەتی پەروەردە لە هەوڵداین كە خوێندنی ئەمساڵ ئەگەر وەرزێكیش بێت دەستپێبكاتەوە و نەفەوتێت”.

وتیشى: “ئێمە لە یەكێتی مامۆستایان هەمیشە لەگەڵ ئەوەدا بووین كە ماف و شایستە داراییەكانی مامۆستایان لەكاتی خۆیدا خەرج بكرێت، بۆیە ئێستاش پێمان وایە، لەگەڵ بڕیاری دەستپێكردنەوەی خوێندن لەناو پۆل بەهەمان شێوە بڕیاری خەرجكردنی مووچە و شایستە داراییەكانی مامۆستایانیشی لەگەڵدا بدرێت بۆ ئەوەی مامۆستایان بتوانن روو لە ناوەندەكانی خوێندن بكەنەوە”.

سەرۆكی یەكێتی مامۆستایانی كوردستان ئەوەشی خستەڕوو: “هه‌ر لەسەرەتای دەستپێكردنی ساڵی نوێی خوێندن بڕیاری خوێندن بەشێوەی ئەلیكترۆنی دەرچووە و تا ئێستاش ئەو جۆرە خوێندنە بەردەوامی هەیە بۆ وەرزی یەكەم، بۆیە ئەگەر وەزارەتی پەروەردە و شارەزایانی ئەو وەزارەتە ئەو جۆرە خوێندنەیان پەسەندكرد، ئەوا بەدڵنیاییەوە پرۆسەی خوێندن كە لە سەرەتای مانگی داهاتوو دەستپێدەكاتەوە بابەتەكانی وەرزی دووەم دەخوێندرێن، بەڵام ئەگەر خوێندنی ئەلیكترۆنی پەسەندنەكرا ئەوا لە وەرزی یەكەمەوە دەستپێدەكاتەوە”.

 

بەشی بکە لە
Previous Next
Close
Test Caption
Test Description goes like this