“درێژه‌كێشانى گفتوگۆكانى نێوان هه‌ولێر و به‌غدا په‌یوه‌ندى به وڵاتانى ده‌وروبه‌ر به تایبه‌ت ئێرانه‌وه هه‌یه”
مه‌حمود عوسمان، سیاسه‌تمه‌دارى كورد
SNN – عەلی حەمەسەعید
سیاسەتمەدارێكى كورد رایده‌گه‌یه‌نێت: درێژەكێشانی گفتوگۆكانی نێوان هەولێر و بەغدا پەیوەندی بە رۆڵی وڵاتانی دەوروبەر بە تایبەت ئێران هەیە، ئه‌مه‌ش بەهۆی ئەو نزیكبوونەوەیەی كورد لەگەڵ ئەمریكا و توركیا هه‌یه‌تى.
د. مەحمود عوسمان، سیاسەتمەداری كورد ئه‌مڕۆ چوارشه‌ممه بە SNNی راگەیاند: “ئەو كاریگەرییانەی كە وڵاتانی هەرێمی بەتایبەت ئێران هەیانه لەسەر بڕیارەكانی عێراق و لایەنە سیاسییە شیعەكان، هۆكار بووە بۆ ئەوەی گفتوگۆكانی نێوان هەولێر و بەغدا درێژە بكێشن و نەتوانن بە ئاسانی كێشەكانی نێوانیان چارەسەر بكەن، ئێران دەیەوێت ئەو پەیامە بە كورد بدات: هەتاوه‌كو بە دڵی ئێمە نەبێت ناتوانن لەگەڵ بەغدا بگەنە رێككەوتن”.
وتیشى: “ئێران پێیخۆش نییه، پەیوەندییەكانی كورد لەگەڵ ئەمریكا و توركیا لە ئاستێكی باشدان، هەست بەوە دەكات كە پەیوەندییەكانی كورد لەگەڵ ئەمریكا و توركیا زیاد لە پێویست بەرەوپێشچوون، بۆیە دەیەوێت بە هەرێمی كوردستان بڵێت: دەبێت رەچاوی رۆڵی ئێران بكرێت لە گەیشتن بە هەر رێككەوتنێك لەنێوان هەولێر و بەغدا، ئەمە سەرەڕای ئەوەی كە عێراق ئەوەش دەزانێت، هەرێم بەهەموو شێوەیەك ئامادەیی دەربڕیووە بۆ گەیشتن بە رێككەوتن، بۆیە دەیەوێت بەجۆرێك رێكبكەوێت كە بەرژەوەندییەكانی هەرێمی كوردستان لە سنوورێكی دیاریكراودا بن”.
ئەو سیاسەتمەدارەی كورد ئەوەشی خستەڕوو: “لە حاڵەتێكدا هەردوو حكومەت بگەنە رێككەوتن، بەڵام هەر دەبێت ئەم رێككەوتنە لە پەرلەمانی عێراق پەسەندبكرێت، بۆیە زۆر گرنگە شاندی حكومەتی هەرێم یان سەركردایەتی سیاسی هەرێم لەوە تێبگەن كە نابێت رۆڵی ئێران لەبەرچاو نەگیرێت بۆ ئەوەی لە پەرلەمان گرفت بۆ ئەو رێككەوتنە دروستنەبێت”.
