بەهرۆز لەبەر بێکاری ڕووی لە ئەوروپا کرد؛ لەوێش شەمەندەفەرێک هیواکانی لەگۆڕنا 

0
422
SNN-محەمەد مستەفا
شەوی 22 ی ئەم مانگە، زیاتر لە 20 گەنجی کۆچبەر کە زۆرینەیان خەڵکی ئیدارەی ڕاپەڕین بوون دەیانەویست بە قاچاغ لە وڵاتی ئیتاڵیاوە بەرەو وڵاتی فەڕەنسا بپەڕنەوە ، بەڵام لەسەر سنوری ئەو دوو وڵاتە دوو گەنجیان دەکەونە ژێر شەمەندەفەرێک و گیان لە دەست دەدەن ، یەکێک لەو دوو گەنجە (بەهرۆز ئیسماعیل) ی تەمەن 23 ساڵی دانیشتووی ناحیەی حاجیاوای ئیدارەی ڕاپەڕین بوو کە بەهیوای گەیشتن بە خەونەکانی لە ئەوروپا ملی ڕێگای هات و نەهاتی گرتبووە بەر .
” براکەم لەبەر بێکاری کۆچی کرد “
ئیبراهیم ئیسماعیلی برای ” بەهرۆز ” لە باسی چیرۆکی براکەی بە SNN ی ووت : بەهرۆزی برام تا پۆلی پێنجەمی ئامادەی خوێند، بۆ دۆزینەوەی هەلێکی کاری گونجاو پەیداکردنی پارە وازی لە خوێندن هێنا، هەرچەندە پێشتریش لەگەڵ خوێندنەکەیدا کاریشی دەکرد، دوای وازهێنانی لە خوێندن ماوەیەک سەرقاڵی کرێکاری و کارکردن بوو بەڵام بە داخەوە کارەکەی وەک پێویست بەردەوام نەبوو هیچ هەلێکی کارکردنی گونجاوی دەست نەکەوت .
ئیبراهیم وتیشی: “دوای بێهیوابوون لە دۆزینەوەی کارێکی باش بەهرۆزی برام بڕیاریدا بەرەو ئەوروپا کۆچ بکات و لەگەڵ ئامۆزایەکی خۆی لە ڕێکەوتی 17ی مانگی 11 ی رابردوو بەرەو تورکیا بەڕێکەوتن، دواتر بە ڕێگای ئاوی زیاتر لە 7 شەو بە یەختێک گەیشتنە ئیتاڵیا، پاش گەیشتنیان بە ئیتاڵیا و خۆ ڕادەست کردنیان بە پۆلیس، لەوێ بۆ ماوەی زیاتر لە 10 ڕۆژ کەرەنتین کران”.
براکەی بەهرۆز باسی لەوەشکرد: لە ئیتاڵیا بەهرۆز لەگەڵ کۆمەڵێک کۆچبەری تری هاوڕێی لەگەڵ قاچاغچیەک ڕێکەوتبوون کە لە ئیتاڵیاوە بە قاچاغ بۆ فەڕەنسا بیان پەڕێنێتەوە لە بەرامبەر بڕێک پارەدا .
” کاکە سبەی لە فەڕەنساوه تەلەفۆنت بۆ دەکەم”

ئیبراهیم لە باسی رووداوەکە ڕایگەیاند “شەوی ڕووداوەکە چەند خولەکێک پێش ڕووداوەکە پەیوەندیم بە بەهرۆزەوە کردووە و بەهرۆز پێی ڕاگەیاندبووم کە ئەوان گەیشتونەتە سنووری فەڕەنسا و ئێستا نزیکن لە وێستگەیەکی شەمەندەفەر و پاش چەند خولەکێکی تر دەگەنە خاکی فەڕەنسا، پێی ڕاگەیاندبووم (کاکە سبەی لە فەڕەنساوە تەلەفۆنت بۆ دەکەم ) بەڵام بە داخەوە بەهرۆز تەلەفۆنی نەکردەوە و بە تەلەفۆنێک مەرگی بەهرۆزمان بیست کە بە داخەوە بەهرۆز و ڕاستی کە ئەویش گەنجێکی ڕانیەبوو لەو وێستگەیە لە کاتی هەوڵدان بۆ پەڕینەوەیان بۆ فەڕەنسا کەوتبوونە ژێر شەمەندەفەرێک و گیانیان لە دەستدا بوو .
ئیبراهیم ئیسماعیل باسی لەوەشکرد، تا ئێستا تەرمی بەهرۆزی برای و ئەو گەنجەی ڕانیە لە ئیتاڵیان، نوێنەرایەتی حکومەتی هەرێم لە ئیتاڵیا و دەزگای لوتکە سەرقاڵی رێکاری یاسایین بۆ گەڕاندنەوەی تەرمەکان بەڵام پێدەچێت بەهۆی جەژنی کریسمسەوە گەڕاندنەوەی تەرمەکانیان چەند ڕۆژێکی تر دوابکەوێت .

بەشی بکە لە
Previous Next
Close
Test Caption
Test Description goes like this