بانكی رافیدەین نرخی دۆلاری جێگیر كرد و “نرخى دۆلار زیاتر به‌رزبووه‌وه‌”

0
2232

SNN – عەلی حەمەسەعید
دوای ئەوەی بانكی ناوەندی عێراق نرخی 100 دۆلارى به‌رامبه‌ر به‌ 147 هه‌زار دینار دیاریكرد، ئەمڕۆ بانكی رافیدەین بە فەرمی داوای لە لقەكانی كرد كە فرۆشتنی دۆلار بەو نرخە جێگیر بكه‌ن، به‌وهۆیه‌وه‌ نرخى دۆلار له‌كاتى داخستنى بازاڕدا به‌رامبه‌ر دینار به‌رزبوونه‌وه‌ى به‌خۆیه‌وه‌ بینى.

ڕەوەز فایەق، خاوەنى نووسینگەی ئاڵوگۆڕی دراو لە بازاڕی دۆلارەكەی شاری سلێمانی بە SNNی راگەیاند: “نرخی دۆلار رۆژانە بەرز و نزمی بەخۆیەوە دەبینێت، ماوەی چەند رۆژێكە لەنێوان 140 تاوه‌كو 142 هەزار دینار بۆ هەر 100 دۆلارێك مامەڵەی پێوە دەكرێت، بەڵام ئێوارەی ئەمڕۆ نرخی دۆلار گەیشتە 143 هەزار دینار، تاڕادەیەك ئەو نرخە بە جێگیری مایەوە لە كاتژمێرەكانی كۆتایی داخستنی بازاڕدا”.

وتیشى: “هۆكاری ئەو بەرز و نزمییەی دۆلار و جێگیرنەبوونی نرخەكەی بۆ ئەوە دەگەڕێتەوە كە هێشتا بەشێكی زۆری هاووڵاتییان و بازرگانەكانیش بەو هیوایەن كە جارێكی دیكە نرخی دۆلار بەرەو دابەزین بڕوات، بەڵام ئەوە كارێكی مەحاڵە، تەنیا بانكی ناوەندی دەسەڵاتی ئەوەی هەیە بڕیار لەسەر بەرزكردنەوە یان كەمكردنەوەی نرخی دۆلار بدات، بۆیە پێشبینی دەكەین لە چەند رۆژی داهاتوودا لە بازاڕی ئاڵوگۆڕی دراویشدا مامەڵە بەو نرخەوە بكرێت كە بانكی ناوەندی عێراق دیاریكردووە،  نرخى 100 دۆلار بۆ 147 هەزار دینار بەرز ببێتەوە”.

هاوكات ئەمڕۆ بانكی رافیدەینی عێراق كه‌ گه‌وره‌ترین بانكى عێراقه‌، داوای لە لقەكانی بەغدا و سەرجەم شارەكانی كردووە به‌شێوه‌ى نووسراوى فه‌رمى، “به ‌پشتبەستن بە نرخی نوێی دۆلار كە بۆ هەر دۆلارێك بە هه‌زار و 460 دینار دیاریكراوە پابەندبن، لەمەودوا مامەڵە بەو نرخە نوێیەوە بكەن لە وەرگرتن و فرۆشتنی دۆلار بەرامبەر بە دینار”.

بەشی بکە لە
Previous Next
Close
Test Caption
Test Description goes like this