بەڕێوەبەری كۆمپانیای دابینكەری غازی ماڵان: ته‌نیا به‌ڕێژه‌ى 13% نرخمان به‌رزكردووه‌ته‌وه
كارگه‌ى پڕكردنه‌وه‌ى بتڵى غازى ماڵان | فۆتۆ: SNN
SNN – عەلی حەمەسەعید
بەڕێوەبەری كۆمپانیای تایبەت بە دابینكردنی غازی ماڵان له هه‌رێمى كوردستان رایده‌گه‌یه‌نێت: لەگەڵ ئەوەی نرخی دۆلار بەڕێژەی 23% بەرزكراوەتەوە، بەڵام ئێمە نرخی غازمان تەنیا بەڕێژەی 13% بەرزكردووەتەوە، هاوكات بە زیادكردنی رێژەی پشكی غازی پارێزگاكانی سلێمانی و هەولێر رێگربووین لەوەی كە نرخی غاز زیاتر بەرزبێتەوە.
سامان حاجی فایەق، بەڕێوەبەری كۆمپانیای ساوس كوردستان تایبەت بە دابینكردنی غازی ماڵان بە SNNی راگەیاند: “لە ئەمڕۆوە نرخی هەر بتڵێك غازی ماڵان لە 7 هەزار و 500 دینارەوە بۆ 8 هەزار و 500 دینار به‌رزبووه‌وه و به‌و نرخه بە هاووڵاتییان دەفرۆشرێت، ئەوەش بەهۆی بەرزبوونەوەی نرخی دۆلارە بەرامبەر بە دینار، هاوكات حكومەتی عێراق نرخی دۆلاری بەڕێژەی 23% بەرامبه‌ر بە دینار بەرزكردووەتەوە، بەڵام ئێمە تەنیا بەڕێژەی 13% نرخەكانمان بەرزكردووەتەوە”.
وتیشى: “پێش بەرزكردنەوەی نرخی دۆلار بەرامبەر بە دینار بڕی ئەو غازەی لەلایەن وەزارەتی سامانە سروشتییەكانه‌وه بۆ هەریەكە لە پارێزگاكانی سلێمانی، هەڵەبجە، هەولێر و دهۆك دابیندەكرا بریتیبوو لە 13 ئۆتۆمبێل بۆ هەولێر و سلێمانی بە پارێزگای هەڵەبجەوە، هەروەها بۆ پارێزگای دهۆكیش بڕی هەشت ئۆتۆمبێل تەرخاندەكرا، بەڵام لە ئێستادا پشكی هەولێر و سلێمانیمان بۆ 15 ئۆتۆمبێل زیاد كردووە، پارێزگای دهۆكیش هەمان بڕی خۆی پێدەدرێت كە هەشت ئۆتۆمبێلی تایبەت بە گواستنەوەی غازی سروشتییە، بەمەش توانیمان رێگربین لە بەرزبوونەوەی زیاتری نرخی غاز”.
بەڕێوەبەری كۆمپانیای ساوس كوردستان ئەوەشی خستەڕوو: “نرخی غاز پەیوەستە بە نرخی دۆلار و دینار، چونكە ئێمە بە دۆلار غاز دەكڕین و بە دینار دەیفرۆشینەوە، بۆیە ئەگەری بەرزبوونەوەی زیاتری نرخی غاز پەیوەستە بە بەرزبوونەوەی زیاتری نرخی دۆلار لەو نرخەی كە ئێستا بانكی ناوەندی عێراق دیاریكردووە”.
پەرەپێدراوە و دروستکراوە