پەرلەمان دەنگ بە دیاریکردنی وەزیری سامانە سرووشتییەکان دەدات
دانیشتنێکى پەرلەمانی کوردستان | فۆتۆ: نووسینگەى راگەیاندنى پەرلەمان
SNN- بڕیار محەمەد
سەرۆکی فراکسیۆنی پارتی لە پەرلەمانی کوردستان دەڵێت: “له ڕۆژی 1/1 تا 1ی ئازار په‌رله‌مان پشووی وه‌رزی یاسادانانی ده‌بێ، به‌ڵام تێگه‌یشتنێکی هاوبه‌ش له‌نێوان سه‌رۆکایه‌تی په‌رله‌مان و فراکسیۆنه‌کان هه‌یه، له‌و ماوه‌یه چه‌ند کۆبوونه‌وه‌یه‌کی نائاسایی بکرێن”.
دەشڵێت: ” ڕه‌نگه له‌م هه‌فتەیە په‌رله‌مانی کوردستان کۆببێته‌وه و له‌نزیکترین کاتدا واده‌ی کۆبوونه‌وه‌که و به‌رنامه‌ی کار دیاری بکرێت”.
بەوتەی ئومێد خۆشناو تایبەت بە پڕکردنه‌وه‌ی پۆستی وه‌زیری سامانه سروشتییه‌کان و هه‌موو ئاماده‌کارییه‌کان ته‌واو بووه و له‌نزیکترین کات سیڤی کاندیدی ئه‌و پۆسته ده‌گاته په‌رله‌مان و له یه‌کێک له کۆبوونه‌وه نزیکه‌کانی په‌رله‌مان داخیلی به‌رنامه‌ی کار ده‌کرێ و متمانه‌ی پێده‌درێت.
بەپێی ئەو زانیارییانەی دەست SNN کەوتوون، سبەی دووشەممە سەرۆکایەتیی پەرلەمانی کوردستان کۆدەبێتەوە بەمەبەستی ئامادەکاریی بۆ دانیشتنی پەرلەمانی کوردستان و رۆژی چوارشەممەی داهاتووش تایبەت دەبێت بۆ دەنگدان لەسەر کاندیدی ئەو پۆستە، کاندیدەکەش د. کەمال ئەتروشی دەبێت.
كەمال ئەتروشی ئێستا پۆستی لە ئەنجومەنی وەزیرانە و ڕاوێژكاری مەسرور بارزانییە بۆ كاروباری وزە و مامۆستای زانكۆی ئەمریكییە لە دهۆك و ماوەیەك ڕاوێژكاری كۆمپانیایەكی كوەیتی بواری نەوت بووە
لە سەرەتای پێکهێنانی کابینەی نۆیەمی حکومەتی هەرێمی کوردستانەوە تاوەکو ئێستا، وەزارەتی سامانە سرووشتییەکان بێ وەزیرە و سەرۆکوەزیران خۆی سەرپەرشتیی ئەو وەزارەتە دەکات.
پەرەپێدراوە و دروستکراوە