لەسەر لێدوانێکی لەبارەی قاسم سلێمانی، کازمی راوێژکارێکی خۆی سڕ دەکات

SNN

ئەمڕۆ سێشەممە مستەفا کازمی سەرۆکوەزیرانی عێراق فەرمانێکی دەرکرد بە سڕکردنی هیشام داوود-ی راوێژکاری خۆی و لێپێچینەوەی بەهۆی لێدوانێکی لەبارەی قاسم سلێمانی فەرماندەی پێشووی فەیلەقی قودسی ئێران.

هیشام داوود لە چاوپێکەوتنێکیدا لەگەڵ کەناڵی بی بی سی لێدوانی لەبارەی قاسم سلێمانی فەرماندەی پێشووی سوپای قودسی ئێران داوە و باسی لە رۆڵی ئەو فەرماندەیە کردووە لە وڵاتەکەیدا.

هیشام لە دیدارەکەیدا لەگەڵ کەناڵی بی بی سی وتبووی: “قاسم سلێمانی باوەڕی وابووە کە ئەو هەماهەنگکار نەبووە لە عێراق، بەڵکو بەرپرسی عێراق بووە، بۆیە هەر کاتێک ویسبێتی هاتووەتە عێراق و کەی ویستبێتی لێی دەرچووە”.

هیشام داوود، راوێژکاری سەرۆکوەزیرانی عێراق بۆ کاروباری گفتوگۆی نیشتمانی لەبارەی ئەو لێدوانەوە رایگەیاندووە، “ئەو چاوپێکەوتنە دوو مانگ بەر لە ئێستا بووە”، دەشڵێت، “وەک توێژەر و کەسێکی ئەکادیمی پسپۆڕ لە کاروباری عێراق بە ئازادی قسەمکردووە و بە فەرمی قسەم نەکردووە.”

لەسەر ئەم پرسە مەهدی ئامرلی ئەندامی لیژنەی بەرگری و ئاسایش لە پەرلەمانی عێراق دەڵێت: “یان هەرچی زووە دەبێت هیشام داوود دوور بخرێتەوە لە پۆستەکەی، یان دەبێ کازمی روونکردنەوە بدات لەوبارەیەوە”.

رۆژی 3ی کانوونی دووەمی ساڵی پار پاش لێکۆڵینەوەی ورد لە جووڵە و شوێنی جەنەڕاڵ قاسم سلێمانی، پاش دابەزینی لە فڕۆکەخانەی بەغدا لەلایەن فڕۆکەیەکی بێ فڕۆکەوانەوە کاروانی ئۆتۆمبێلەکانی کرایە ئامانج و تێیدا قاسم سلێمانی و ئەبو مەهدی موهەندیس سەرۆکی گشتی دەستەی حەشدی شەعبی و چەند پاسەوان و فەرماندەیەکی دیکە کوژران.

لە ئەنجامی هێرشەکە و دوای چەند رۆژێک ئێران بەچەند مووشەکێک بۆ سەر بنکە سەربازییەکانی ئەمریکا لە عێراق وەڵامی دایەوە بەبێ بوونی هیچ زیانێکی مرۆیی.