ده‌نگنه‌دانى به‌شێك له‌ په‌رله‌مانتاره‌كانى گۆڕان به‌ كه‌مال ئه‌تروشى پارتى نیگه‌ران كردووه‌

0
163
لۆگۆى پارتى دیموكراتى كوردستان و بزووتنه‌وه‌ى گۆڕان | فۆتۆ: SNN

SNN

بڕیاره‌ ئه‌مڕۆ چوارشه‌ممه‌ په‌رله‌مانى كوردستان به‌ مه‌به‌ستى متمانه‌دان به‌ كاندیدى وه‌زیرى سامانه‌ سروشتییه‌كان كۆبێته‌وه‌، فراكسیۆنه‌كانى: یه‌كگرتوو، كۆمه‌ڵ، نه‌وه‌ى نوێ و به‌شێك له‌ فراكسیۆنى گۆڕان بڕیاریانداوه‌ ده‌نگ به‌و كاندیده‌ نه‌ده‌ن، له‌ به‌رامبه‌ریشدا پارتى دیموكراتى كوردستان نیگه‌رانه‌ له‌ ده‌نگنه‌دانى ئه‌و په‌رله‌مانتارانه‌ى بزووتنه‌وه‌ى گۆڕان.

ڕێبوار بابكه‌ى، ئه‌ندامى فراكسیۆنى پارتى دیموكراتى كوردستان له‌ په‌رله‌مانى كوردستان له‌و باره‌یه‌وه‌ به‌ SNNى راگه‌یاند: “چه‌ند په‌رله‌مانتارێكى بزووتنه‌وه‌ى گۆڕان باسى ئه‌وه‌یان كردووه‌ له‌ كۆبوونه‌وه‌ى ئه‌مڕۆى په‌رله‌ماندا ده‌نگ به‌ كه‌مال ئه‌تروشى، كاندیدى وه‌زیرى سامانه‌ سروشتییه‌كان ناده‌ن، من ده‌مه‌وێت ئه‌وه‌ بپرسم، بۆچى ده‌نگ به‌ كاندیده‌كانى خۆیان ده‌ده‌ن بۆ پڕكردنه‌وه‌ى پۆسته‌ وه‌زاریی و حكومییه‌كانى تر، بۆچى ده‌نگ بۆ ئه‌م كاندیده‌ ناده‌ن، ده‌نگنه‌دانى ئێوه‌ چ نهێنیه‌كى تێدایه‌ له‌كاتێكدا كه‌ حزبه‌كه‌تان له‌ حكومه‌ته‌”.

وتیشى: “ئه‌م جۆره‌ مامه‌ڵه‌ كردنه‌ ئه‌وه‌ ده‌رده‌خات كه‌ ره‌نگه‌ په‌یوه‌ندییه‌كى باش له‌نێوان ته‌واوى ئه‌ندامانى فراكسیۆنه‌كه‌دا نه‌بێت، بۆیه‌ من پێیان ده‌ڵێم: ئه‌گه‌ر ئێوه‌ به‌شێكن له‌ فراكسیۆنى گۆڕان پابه‌ند بن به‌ به‌رنامه‌ى حزبه‌كه‌تانه‌وه‌، ئه‌گه‌ر نا رایبگه‌یه‌نن كه‌ جیابوونه‌ته‌وه‌ بۆ ئه‌وه‌ى ئێمه‌ بزانين مامه‌ڵه‌ له‌گه‌ڵ كێ ده‌كه‌ین”.

له‌ به‌شێكى ترى قسه‌كانیدا ئه‌و ئه‌ندامه‌ى فراكسیۆنى پارتى ره‌خنه‌ له‌ هه‌ڵوێستى ئه‌و په‌رله‌مانتارانه‌ ده‌گرێت و ئه‌وه‌شده‌خاته‌ڕوو: “ئێمه‌ ده‌نگى ته‌واوه‌تیمان بۆ متمانه‌دان به‌ كاندیدى وه‌زیرى سامانه‌ سروشتییه‌كان كۆكردووه‌ته‌وه‌، له‌به‌ر ئه‌وه‌ هه‌ڵوێستى ئه‌و په‌رله‌مانتارانه‌ ته‌نیا ئیحراجى بۆ بزووتنه‌وه‌ى گۆڕان دروستده‌كات نه‌وه‌ك پارتى دیموكراتى كوردستان”.

قسه‌كانى ئه‌و په‌رله‌مانتاره‌ى فراكسیۆنى پارتى له‌كاتێكدایه‌ كه‌ دوێنێ سێشه‌ممه‌ عه‌لى حه‌مه‌ساڵح، ئه‌ندامى فراكسیۆنى گۆڕان به‌ SNNى راگه‌یاند: “هیچ شتێك له‌سه‌ر ده‌نگدان به‌ كاندیدى وه‌زیرى سامانه‌ سروشتییه‌كان ناڵێم، تاوه‌كو دانیشتنى به‌یانى كه‌ كۆبوونه‌وه‌كه‌ ده‌كرێت هه‌ڵوێستى خۆمان ده‌بێت”.

 

بەشی بکە لە
Previous Next
Close
Test Caption
Test Description goes like this