“هیچ بیانوویه‌كمان نه‌هێشتووه‌ته‌وه‌ بۆ به‌غدا كه‌ به‌شه‌ بودجه‌ى هه‌رێم نه‌نێرێت”

0
275

SNN

جێگرى سه‌رۆكى په‌رله‌مانى كوردستان رایده‌گه‌یه‌نێت: ئاراسته‌یه‌كى تووند له‌ ئه‌نجوومه‌نى نوێنه‌رانى عێراق هه‌یه‌ به‌ ئاراسته‌ى رێگه‌نه‌دان به‌ رێككه‌وتنى هه‌رێم و ناوه‌ند، ده‌شڵێت: “هیچ بیانوویه‌كمان نه‌هێشتووه‌ته‌وه‌ بۆ به‌غدا كه‌ به‌شه‌ بودجه‌ى هه‌رێم نه‌نێرێت”.

ئه‌مڕۆ چوارشه‌ممه‌ هێمن هه‌ورامى، جێگرى سه‌رۆكى په‌رله‌مانى كوردستان له‌به‌رده‌م میدیاكان له‌ شارى هه‌ولێر رایگه‌یاند: “ئێمه‌ له‌گه‌ڵ شاندى باڵاى حكومه‌تى هه‌رێمى كوردستان تاوه‌كو دره‌نگانێكى شه‌وى رابردوو له‌سه‌ر هێڵ بووین، ئه‌وان كۆبوونه‌وه‌كانیان به‌رده‌وامن، له‌ دوو رۆژى داهاتووشدا ئه‌و كۆبوونه‌وانه‌ به‌رده‌وام ده‌بن، بۆ ئه‌وه‌ى له‌سه‌ر بنه‌ماى ئه‌و رێككه‌وتنه‌ى كه‌ كراوه‌ هه‌ولێر و به‌غدا بگه‌نه‌ رێككه‌وتنى كۆتایی و پشكى هه‌رێم له‌ بودجه‌ى 2021ى تێبپه‌ڕێنرێت”.

وتیشى: “شاندى باڵاى هه‌رێم هیچ بیانوویه‌كیان نه‌هێشتووه‌ته‌ بۆ ئه‌وه‌ى به‌غدا رێكنه‌كه‌وێت له‌گه‌ڵ هه‌ولێر و پشكى بودجه‌ى هه‌رێمى تێبپه‌ڕێنرێت، به‌ڵام به‌داخه‌وه‌ له‌ په‌رله‌مانى عێراق ئاراسته‌یه‌كى تووند هه‌یه‌ كه‌ نایه‌وێت پشكى هه‌رێم بنێردرێت و نه‌گه‌ینه‌ رێككه‌وتن”.

جێگرى سه‌رۆكى په‌رله‌مانى كوردستان باسى له‌وه‌شكرد: “كێشه‌كه‌ له‌ ئێستادا له‌سه‌ر مادده‌ى 11ى پرۆژه‌یاساكه‌یه‌، كه‌ په‌یوه‌سته‌ به‌ راده‌ستكردن و هه‌نارده‌كردنى نه‌وت له‌لایه‌ن هه‌رێمه‌وه‌، هه‌رچه‌نده‌ هه‌رێم كێشه‌ى نییه‌ له‌گه‌ڵ ئه‌و ده‌قه‌دا چ به‌ راده‌ستكردنى 250 هه‌زار به‌رمیل نه‌وت بێت یاخود به‌ راده‌ستكردنى داهاتى ئه‌و نه‌وته‌ بێت”.

قسه‌كانى جێگرى سه‌رۆكى په‌رله‌مانى كوردستان له‌كاتێكدایه‌ كه‌ 113 ئه‌ندامى ئه‌نجوومه‌نى نوێنه‌رانى عێراق له‌میانى یاداشتێكدا كه‌ له‌باره‌ى گۆڕانكارییه‌كانى چه‌ند مادده‌یه‌ك له‌ پرۆژه‌یاساى بودجه‌ى عێراق خستوویانه‌ته‌ڕوو داواى ئه‌وه‌ ده‌كه‌ن هه‌رێم له‌به‌رامبه‌ر پشكى خۆى 460 هه‌زار به‌رمیل نه‌وتى رۆژانه‌ راده‌ستى سۆمۆ بكات.

 

بەشی بکە لە
Previous Next
Close
Test Caption
Test Description goes like this