دەزگای هەواڵگریی ئەمریکا زانیاری مەترسیدار لەبارەی رۆژێک پێش هەڵکوتانە سەر کۆنگرێس ئاشکرا دەکات

SNN

نووسینگەی لێکۆڵینەوەی فیدراڵیی ئەمریکا رایدەگەیەنێت “رۆژێک پێش هەڵکوتانە سەر بینای کۆنگرێس کە 6ی ئەم مانگە بوو، دوو بۆمبی چێنراو لە نزیک بارەگای دوو حزبە سەرەکییەکە (دیموکرات و کۆماری)یەکان دانراون”.

نووسینگەی ئێف بی ئای خەڵاتێکی 100 هەزار دۆلاریی داناوە بۆ هەر کەسێک زانیاری بدات لەسەر ئەو کەسانەی هەستاون بە دانانی ئەو بۆمبانە و وردەکاریی لەبارەی گومانلێکراوەکانیش بڵاوکردووەتەوە.

بەپێی ئەو پۆستەرانەی دەزگای هەواڵگریی ئەمریکا ئامادەی کردوون، بۆمبەکان لەنێوان کاتژمێر 7:30 بۆ 8:30 خولەکی ئێوارە واتە لە 5ی مانگ رۆژێک پێش هەڵکوتانە سەر بینای کۆنگرێس دانراون.

ئێف بی ئای پێڵاوەکانی گومانبارەکەشی ناسیوەتەوە کە لە جۆری Nike Air Max Speed ​​Turf ە و رەنگەکەی زەرد و رەش و خۆڵەمێشییە.

رۆژی 6ی ئەم مانگە لەکاتی دانیشتنەکانی کۆنگرێس بۆ داننان بەسەرکەوتنی جۆ بایدن سەرۆکی هەڵبژێردراوی ئەمریکا بەسەر دۆناڵد ترەمپ سەرۆکی پێشووی ئەمریکادا دوای کۆبونەوە و گوێگرتن لەوتارێکی ترەمپ، لایەنگرانی هێرشیانکردە سەر بینای کۆنگرێس و بەهۆیەوە دانیشتنەکان راگیران، دواتر پۆلیس گیانلەدەستدانی چوار کەس و دەستگیرکردنی 52 کەسی دیکەی راگەیاند.