“هێزه‌ عێراقییه‌كان ته‌نانه‌ت یه‌ك ته‌له‌فۆنیشیان نه‌كردووه‌ بۆ كارى هاوبه‌ش دژى داعش”

0
279
پێشمه‌رگه‌یه‌ك له‌كاتى ئه‌ركدا | فۆتۆ: Sebastian Meyer/Corbis

SNN ـ سیروان حه‌سه‌ن
جموجۆڵى چه‌كداره‌كانى داعش له‌ ناوچه‌ كێشه‌ له‌سه‌ره‌كان و په‌لاماردانى هاووڵاتیانى ئه‌و سنوورانه‌ به‌ گشتى و هاووڵاتیانى كورد به‌ تایبه‌تى تا دێت روو له‌ زیادبوونه‌ به‌ وته‌ى فه‌رمانده‌یه‌كى پێشمه‌رگه‌ش، “تاوه‌كو ئێستا هیچ هه‌نگاوێك له‌ نێوان پێشمه‌رگه‌ و هێزه‌ عێراقییه‌كاندا نه‌نراوه‌ بۆ هه‌ماهه‌نگى و كارى هاوبه‌ش”.

ته‌قینه‌وه‌ى بۆمبى چێنراو، رفاند، كوشتنى هاووڵاتیان، سووتاندنى دغڵ و دانه‌كانیان، ئه‌و هه‌واڵانانه‌ن كه‌ رۆژانه‌ له‌ ناوچه‌ كێشه‌ له‌سه‌ره‌كان ده‌یانبیستین، سه‌ره‌ڕاى داواكارى هاووڵاتیان بۆ به‌هاناوه‌ چوونیان، به‌ڵام هێزه‌ عێراقییه‌كان هیچ گۆڕانكارییه‌كیان نه‌كردووه‌ و داواى هاوكارى و هه‌ماهه‌نگیش له‌ پێشمه‌رگه‌ نه‌كراوه‌.

كه‌مال مه‌حمود، فه‌رمانده‌ى لیواى پێنجى شاره‌زوور له‌ سنوورى خانه‌قین به‌ (SNN)ى راگه‌یاند: “سه‌ره‌ڕاى ئه‌و بارودۆخه‌ ناله‌به‌ر و دژواره‌ى به‌هۆى په‌لامار و كرده‌وه‌كانى داعش-ه‌وه‌ له‌ سنوورى خانه‌قین هاتووه‌ته‌ ئاراوه‌، به‌ڵام تاوه‌كو ئێستا هیچ هه‌ماهه‌نگى و نزیكبوونه‌وه‌یه‌ك له‌ نێوان هێزه‌ عێراقییه‌كان و پێشمه‌رگه‌ رووینه‌داوه‌”.

وتیشى: “ته‌نانه‌ت ته‌له‌فونێكیش له‌ هێزه‌ عێراقییه‌كانه‌وه‌ بۆ پێشمه‌رگه‌ نه‌هاتووه‌ بۆ كارى هاوبه‌شى و دانانى پلانى تۆكمه‌ و گۆڕانكارى كردن بۆ ئه‌وه‌ى بتوانرێت ناوچه‌كه‌ له‌و په‌لامارانه‌ى داعش بپارێزن و كۆنترۆڵى بكه‌ن”.

ئه‌و فه‌رمانده‌یه‌ى پێشمه‌رگه‌ ئه‌وه‌شى خسته‌ڕوو: “ئه‌وه‌ى ئێستا له‌ ناوچه‌ كێشه‌ له‌سه‌ره‌كان رووده‌دات سه‌باره‌ت به‌ سووتاندنى گه‌نم و جۆى جوتیاران و كوشتنى جوتیاران، به‌شێكى په‌یوه‌ندى به‌و زه‌وییانه‌وه‌ هه‌یه‌ كه‌ كورده‌كان تێيدا ده‌ژین و هى باوباپیرانیانه‌، به‌ڵام له‌سه‌رده‌مى رژێمى به‌عس كورده‌كان راگوێزران و عه‌ره‌بى هاورده‌ خرایه‌ شوێنه‌كانیان، بۆیه‌ ئێستا داعش و عه‌ره‌بى سووننه‌ى ناوچه‌كه‌ ده‌یه‌وێت جارێكى دیكه‌ بگه‌ڕێنه‌وه‌ سه‌ر ئه‌و زه‌وییانه‌”.

فه‌رمانده‌كه‌ى پێشمه‌رگه‌ ئاماژه‌ى به‌وه‌شكرد: “وه‌ك هێزه‌كانى پێشمه‌رگه‌ له‌ سنوورى دیاریكراوى خۆمان له‌ ئاماده‌باشیدان به‌ وردى چاودێرى ناوچه‌كه‌ ده‌كه‌ین، به‌ڵام سه‌باره‌ت به‌ داواكارى هاووڵاتیانى كوردى ناوچه‌كانى خانه‌قین و ده‌وروبه‌رى بۆ به‌هاناوه‌ چوونیان ئه‌و ناوچانه‌ له‌ ژێرده‌سه‌ڵاتى هێزه‌ عێراقییه‌كاندایه‌ و پێشمه‌رگه‌ ناتوانێت هیچ هه‌نگاوێك بنێت هه‌تاوه‌كو له‌ ئاستى هه‌ردوو حكومه‌تى هه‌رێم و عێراق رێكه‌وتن نه‌كرێت”.

له‌ دواى كشانه‌وه‌ى پێشمه‌رگه‌، له‌ ماوه‌ى دوو ساڵى رابردوودا له‌ سنوورى خانه‌قین، به‌هۆى خراپى بارودۆخى ئه‌منییه‌وه‌ ده‌یان هاووڵاتى كوژراون و رفێندراون، زیاتر له‌ دوو هه‌زار خێزانى كورد كۆچیان كردووه‌ و ژماره‌یه‌ك گوندى كوردیش چۆڵبوون.

بەشی بکە لە
Previous Next
Close
Test Caption
Test Description goes like this