“پێشنیارى نوێ بۆ رێككه‌وتنى هه‌ولێر و به‌غدا هه‌یه‌”

0
2028

SNN
ئه‌ندامێكى ئه‌نجوومه‌نى نوێنه‌رانى عێراق رایده‌گه‌یه‌نێت: پێشنیارى نوێ له‌نێوان هه‌ولێر و به‌غدا هاتووه‌ته‌ ئاراوه‌ بۆ رێككه‌وتن، ده‌شڵێت: “نزیكبوونه‌وه‌ له‌نێوان ناوه‌ند و هه‌رێم هه‌یه‌”.

ئه‌مڕۆ دووشه‌ممه‌ مه‌زه‌ر كوڕه‌وى، ئه‌ندامى ئه‌نجوومه‌نى نوێنه‌رانى عێراق به‌ میدیاكانى عێراقى راگه‌یاند: “ته‌وافوقى سیاسى ئه‌و شته‌یه‌ كه‌ پرۆژه‌یاساى بودجه‌ى عێراقى له‌سه‌ر داڕێژراوه‌، به‌ پێچه‌وانه‌شه‌وه‌ بۆ هه‌میشه‌ كێشه‌كان ده‌مێننه‌وه‌ به‌بێ چاره‌سه‌ر، له‌ ئێستاشدا ته‌وافوقى سیاسى له‌ عێراق گه‌یشتووه‌ته‌ 90%، ته‌نیا چه‌ند مادده‌یه‌ك له‌ بودجه‌ ماون كه‌ رێككه‌وتنیان له‌سه‌ر ده‌كرێت”.

له‌باره‌ى رێككه‌وتنى هه‌ولێر و به‌غدا له‌سه‌ر پشكى هه‌رێم له‌ پرۆژه‌یاساى بودجه‌ى 2021دا ئه‌و ئه‌ندامه‌ى ئه‌نجوومه‌نى نوێنه‌رانى عێراق ئاشكرایده‌كات: “له‌ ماوه‌ى 72 كاتژمێرى رابردوودا چه‌ند پێشنیارێكى نوێ و بیرۆكه‌ى نوێ هاتوونه‌ته‌ ئاراوه‌ بۆ ئه‌وه‌ى هه‌رێم و ناوه‌ند بگه‌نه‌ رێككه‌وتنێك پێش ئه‌وه‌ى پرۆژه‌یاساكه‌ بخرێته‌ به‌رده‌م په‌رله‌مانتاران بۆ ده‌نگدان هه‌فته‌ى داهاتوو”.

مه‌زه‌ر كوڕه‌وى هه‌رچه‌نده‌ ئاماده‌ نییه‌ ده‌قى پێشنیاره‌كان ئاشكرا بكات، به‌ڵام ئه‌وه ‌ده‌خاته‌ڕوو: “له‌ ئێستادا نزیكبوونه‌وه‌ هه‌یه‌ له‌نێوان هه‌ولێر و به‌غدا، به‌تایبه‌ت له‌باره‌ى نه‌وت و گومرك و شایسته‌ داراییه‌كانى هه‌رێم”.

قسه‌كانى ئه‌و ئه‌ندامه‌ى ئه‌نجوومه‌نى نوێنه‌رانى عێراق له‌كاتێكدایه‌ كه‌ له‌ ئێستادا شاندى حكومه‌تى هه‌رێم به‌ سه‌رۆكایه‌تى قوباد تاڵه‌بانى، جێگرى سه‌رۆكى حكومه‌تى هه‌رێم له‌ به‌غدان به‌ مه‌به‌ستى گه‌یشتن به‌ رێككه‌وتنى كۆتایی له‌سه‌ر پشكى هه‌رێم له‌ پرۆژه‌یاساى بودجه‌ و گفتوگۆكانیان به‌رده‌وامن.

هاوكات هه‌ر ئه‌مڕۆ ریاز مەسعودی، پەرلەمانتاری رەوتی سەدر لە ئەنجوومەنی نوێنەرانی عێراق وتى: “بە بێ رێککەوتن لەسەر پشکی هەرێمی کوردستان ناکرێت پرۆژەیاسای بودجە لە پەرلەمان تێبپەڕێت، بگرە ئەو بژاردەیە هەرگیز روو نادات”.

 

بەشی بکە لە
Previous Next
Close
Test Caption
Test Description goes like this