كه‌ى ده‌نگدان له‌سه‌ر پرۆژه‌یاساى بودجه‌ى 2021ى عێراق ده‌ستپێده‌كات؟

0
153

SNN

ئه‌ندامێكى لیژنه‌ى دارایی له‌ ئه‌نجوومه‌نى نوێنه‌رانى عێراق رایده‌گه‌یه‌نێت: كۆتایی ئه‌م هه‌فته‌یه‌ یان سه‌ره‌تاى هه‌فته‌ى داهاتوو كاره‌كانى پرۆژه‌یاساى بودجه‌ى 2021ى عێراق له‌ لیژنه‌ى دارایی كۆتایی دێت، ده‌شڵێت: “تاوه‌كو پرسى رێككه‌وتنى هه‌ولێر و به‌غدا نه‌كه‌وێت به‌لایه‌كدا ده‌نگ له‌سه‌ر پرۆژه‌یاساى بودجه‌ نادرێت”.

ئه‌مڕۆ سێشه‌ممه‌ جه‌مال كۆچه‌ر، ئه‌ندامى لیژنه‌ى دارایی له‌ ئه‌نجوومه‌نى نوێنه‌رانى عێراق به‌ میدیاكانى عێراقى راگه‌یاند: “زۆرینه‌ى پێداچوونه‌وه‌ و زیادكردنه‌كانى پرۆژه‌یاساى بودجه‌ى عێراق كۆتاییان هاتووه‌، نێردراونه‌ته‌وه‌ بۆ حكومه‌ت بۆ ئه‌وه‌ى پێداچوونه‌وه‌یان بۆ بكات، ئه‌وانیش ته‌نیا ماوه‌ى دوو رۆژیان پێویسته‌ بۆ ئه‌وه‌ى قسه‌ى خۆیان له‌سه‌ر بابه‌ته‌كه‌ بكه‌ن”.

وتیشى: “زۆرینه‌ى كاره‌كانى پرۆژه‌یاساى بودجه‌ كۆتاییان هاتووه‌ و پێشبینى ده‌كه‌ین سه‌ره‌تاى هه‌فته‌ى داهاتوو یان كۆتایی ئه‌م هه‌فته‌یه‌ پرۆژه‌یاساكه‌ ئاماده‌بێت بۆ ده‌نگدان له‌سه‌رى، به‌ڵام ده‌نگدان له‌سه‌ر پرۆژه‌یاساى بودجه‌ كاتێك ده‌ستپێده‌كات كه‌ پرسى رێككه‌وتنى هه‌ولێر و به‌غدا یه‌كلابووبێته‌وه‌ و رێككه‌وتبن”.

قسه‌كانى ئه‌و ئه‌ندامه‌ى لیژنه‌ى دارایی له‌كاتێكدایه‌ كه‌ هه‌ر ئه‌مڕۆ شیروان میرزا ئه‌ندامى هه‌مان لیژنه‌ له‌ چاوپێكه‌وتنێكى ته‌له‌فزیۆنیدا رایگه‌یاند: “ئه‌مڕۆ یان سبه‌ى ته‌واوى كاره‌كانى پرۆژه‌یاساى بودجه‌ له‌ په‌رله‌مان كۆتایی دێت، چونكه‌ ته‌نیا كۆبوونه‌وه‌یه‌ك یان دوو كۆبوونه‌وه‌مان ماوه‌”.

له‌باره‌ى پشكى هه‌رێمه‌وه‌ ئه‌وه‌شى خسته‌ڕوو: “بۆ تێپه‌ڕاندنى پشكى هه‌رێم پێویسته‌ كۆبوونه‌وه‌ى فراوانى لایه‌نه‌ سیاسییه‌كان بكرێت”.

بەشی بکە لە
Previous Next
Close
Test Caption
Test Description goes like this