وتەبێژی حکومەتی هەرێمی کوردستان راگەیەندراوێک بڵاودەکاتەوە

0
335
جوتیار عادل، وته‌بێژى حكومه‌تى هه‌رێم | فۆتۆ: SNN

SNN

له‌ راگه‌یه‌ندراوێكدا ئەمڕۆ شەممە، جوتیار عادل، وته‌بێژی حكومه‌تی هه‌رێمی كوردستان دووپاتیكرده‌وه‌، حكومه‌تی هه‌رێم ته‌واوی ژماره‌ و داتا تایبه‌ته‌كانی داهات و خه‌رجییه‌ نه‌وتی و نانه‌وتییه‌كان و تۆماری بایۆمه‌تریی مووچه‌خۆرانی هه‌رێمی كوردستانی پێشكه‌ش به‌ به‌غدا كردووه‌ و راشیگه‌یاند‌: حكومه‌تی هه‌رێمی كوردستان جه‌خت له‌سه‌ر پابه‌ندبوونه‌كانی ده‌كاته‌وه‌ و به‌گوێره‌ی كارنامه‌ی كابینه‌ی نۆی حكومه‌تی هه‌رێم بڕوای به‌ شه‌فافیه‌ت هه‌یه‌.

ده‌قی راگه‌یه‌ندراوه‌كه‌ی گوته‌بێژی حكومه‌تی هه‌رێمی كوردستان:

حكومەتی هەرێمی كوردستان هەموو ژمارە و داتاكانی تایبەت بە داهات و خەرجیی نەوتی و نانەوتی و تۆماری بایۆمەتری مووچەخۆرانی هەرێمی کوردستانی پێشكەش بە بەغدا كردووە.

لە کاتێکدا پەسەندکردنی یاسای بودجەی عێراق بۆ ساڵی 2021، لە دوایین قۆناغەکانییەتی، دوای گفتوگۆیەکی زۆر لەگەڵ هەموو لایەنە پەیوەندیدارەکان، حکومەتی هەرێمی کوردستان پابەندبوونی خۆی بە گشت پابەندییەکانی دووپات دەکاتەوە و بڕوای بە شەفافیەت هەیە وەک لە کارنامەی کابینەی نۆیەمی حکومەتدا هاتووە.

حكومەتی هەرێم بە نووسراوی ژمارە (7-تایبەت) لە 1-2-2021، لیژنەی دارایی ئەنجومەنی نوێنەرانی عێراقی ئاگادارکردووەتەوە لە هەموو وردەكارییەكانی پەیوەست بە پڕۆسە و داهات وخەرجییەکانی نەوتی (پشتبەست بە ڕاپۆرتی ووردبینی و پێداچوونەوەی كۆمپانیای دیلۆیتی نێودەوڵەتیی) سەرەڕای ناردنی ژمارەکانی پەیوەست بە سەرچاوەکانی داهاتی نانەوتی و دەروازە سنوورییەکان و بڕی داھاتەکانیان پشتبەست بە بەیانی دارایی ساڵانەی وەزارەتی دارایی و ئابووری ھەرێم. ئەمە سەرەڕای ناردنی خشتەی ژمارە و زانیاری تایبەت بە مووچەخۆرانی ھەرێمی کوردستان، پشتبەست بە پڕۆگرامی تۆماری بایۆمەتری.

حكومەتی هەرێمی كوردستان، هەمیشە جەخت لەسەر پابەندبوون بە پڕەنسیپی شەفافیەت دەكاتەوە لەبارەی ئاشكرا كردنی داهاتی نەوتی و نانەوتی خۆی، بۆ ڕای گشتی و حکومەتی فیدڕاڵ، تا ئێستاش بە نووسراوی فەرمی وەڵامی وردی هەموو پرسیارەکانی ھەردوو وەزارەتی دارایی و نەوتی عێراق و ھەروەھا لیژنەی دارایی ئەنجومەنی نوێنەرانیشی داوەتەوە.

هاوكات ھەرێم جارێکی تر، ئامادەیی خۆیشی دووپات دەكاتەوە بۆ ڕوونكردنەوەی هەر پرسیارێكی دیکەی پەیوەست بەم بابەتەوە، بۆلادانی هەموو ئەو تەمومژیانەی كاریگەریان بەسەر ڕێڕەوی لێكگەیشتن و ڕێككەوتنی نێوان هەردوولا دەبێت.

بەشی بکە لە
Previous Next
Close
Test Caption
Test Description goes like this