بافڵ تاڵەبانی: لەپێناو هەڵەبجەدا هەموو تواناکانم دەخەمەگەڕ

0
1387

SNN

بافڵ تاڵەبانی، هاوسەرۆکی یەکێتیی نیشتمانیی کوردستان لە پەیامێکیدا بەبۆنەی ساڵیادی کیمیابارانکردنی هەڵەبجەوە دەڵێت: هەروەک چۆن بە هەوڵی یەکێتی هەڵەبجە بووە پارێزگا، ئێستاش هەموو ئۆرگانەکانمان دەخەینە خزمەت هەڵەبجە.

بافڵ تاڵەبانی روو لە هەڵەبجەییەکان دەڵێت: “دەزانم لە رابردوودا بەلێنی زۆرتان پێدراو تەنیا دروشم بوو، بەڵام هەموو تواناکانم دەخەمەگەڕ و پاڵپشت و هاوکارتان دەبم”.

دەقی پەیامەکەی:

ئەمڕۆ ٣٣ ساڵ بەسەر کارەساتی جینۆسایدی کیمیابارانکردنی شاری ھەڵەبجە تێدەپەڕێت .
لەم ساڵڕۆژە خەمناکەدا نیگەرانین کە تاوەکو ئێستا ئاسەواری ئەم برینە ساڕێژنەبووە بەسەر کەسوکاری سەربەرزی شەھیدان، بریندارانی چەکی کیمیاوی و شاری غەدرلێکراوی ھەڵەبجەوە.

کیمیابارانی ھەڵەبجە یەکێکە لە دڕندانەترین تاوانەکانی مێژووی مرۆڤایەتی و غەدرێکی گەورەیە کە دەرحەق بە گەلی کورد ئەنجامدراوە. تاوانێک کە هەمیشە لە ویژدانماندا بە زیندوویی دەمێنێتەوە. بەرپرسیارێتی نەتەوەیی و نیشتمانیمان بەرامبەر ئەم ئازارە سورترمان دەکات لە بەردەوامی ھەوڵەکانمان بۆ خزمەتکردنی ھەڵەبجە و بریندارانی ئەم شارە .

ئێمە لە سەرۆکایەتیی یەکێتیی نیشتمانیی کوردستان بەپەرۆشەوە لە ئاوەدانکردنەوەی ھەڵەبجە و خزمەتکردنی خەڵکەکەی دەڕوانین. وەک چۆن لە رابردوودا دەستپێشخەربووین و بەھەوڵی یەکێتی، هەڵەبجە بووە پارێزگا، ئێستاش سەرجەم ئۆرگانەکانمان دەخەینە خزمەتی هەڵەبجە و هەڵەبجەییە سەربەرزەکانەوە. فشاری زیاتر لە حکومەت و دامەزراوە پەیوەندیدارەکان دەکەین کە دەستی ئاوەدانی زیاتر لەم شارە بەگەڕ بخەن و خزمەتی زیاتری بریندارانی چەکی کیمیاوی و کەسوکاری شەھیدان بکەن. دەبێت پێکەوە ھەڵەبجە بکەینە شاری ئاوەدانی و ناسنامەی پایتەختی ئاشتیش بکەینە سیمبولی خۆڕاگری، ئیرادە و بەردەوامی.
ئێمە دەزانین لە رابردوودا بەڵێنی زۆر بە هەڵەبجە دراوە و تەنها وەک دروشم ماوەتەوە، دەزانین بەدەمەوەنەچوونی حکومەت بۆ داواکارییەکانیان زیاتر دڵی هەڵەبجەییەکانی شکاندووە. دەمەوێت لەم یادە مێژووییەدا رایبگەیەنم کە هەموو تواناکانم دەخەمەگەڕ و پاڵپشت و هاوکارییان دەبم.

رابردووی ئێمە پڕە لە نەهامەتی و ئازار و قوربانیدان، ئەگەر ناکۆکییە شەخسی و حیزبییەکانمان وەلانەنێین و پێکەوە لەپێناو کوردستانێکی خۆشگوزەران و ئارام هەوڵنەدەین، رۆحی شەهیدانمان ئارام نابن و بەرپرسیارێتی نیشتمانیی و نەتەوەییمان دەکەوێتە ژێر پرسیارەوە.
دەبێت ئەمڕۆ رۆژی پەندوەرگرتن بێت، دەبێت لەوە تێبگەین کوردستان پێویستی بە هەموومانە. دەبێت هەموومان بە رۆحێکی کوردانەوە بجەنگین لە پێناو کورد و کوردستان و خەڵکە شەرەفمەندەکەی کە شایستەی ژیانێکی باشتر و خۆشگوزەرانترن.

سڵاو لە گیانی پاكی شەهیدانی كیمیابارانی هەڵەبجە و سەرجەم شەهیدانی رێگەی رزگاریی كوردستان.

بافڵ تاڵەبانی
هاوسەرۆکی یەکێتیی نیشتمانیی کوردستان

بەشی بکە لە
Previous Next
Close
Test Caption
Test Description goes like this