بەریتانیا 624 ملیۆن دۆلار بۆ دۆزینەوەی ئەیمەن زەواهیری تەرخان دەکات

0
131

SNN

بەریتانیا 450 ملیۆن پاوەن کە دەکاتە 624 ملیۆن دۆلار بۆ دۆزینەوەی ئەیمەن زەواهیری، سەرۆکی رێکخراوی قاعیدە تەرخان دەکات.

میدیاکانی بەریتانیا بڵاویانکردەوە، هێزە تایبەتەکانی ئەو وڵاتە بە بەکارهێنانی ئەو بودجەیە ئامادەکاری دەکەن بۆ بەدواداگەڕان، دەستگیرکردن یان کوشتنی ئەیمەن زەواهیری، کە پزیشکێکی میسریی تەمەن 69 ساڵە و دوای کوژرانی ئوسامە بن لە 2011، بووەتە سەرۆکی رێکخراوی قاعیدە.

هەریەکە لە هێزی تایبەتی ئاسمانی ناسراو بە “خزمەتگوزاری تایبەتی ئاسمانی” و هێزی دەریایی تایبەتی بەریتانی دەچنە پاڵ ئەو هێزە ئەمریکییانەی کە بەدوای زەواهیریدا دەگەڕێن.

ئەم بڕیارەی بەریتانیا دوای ئەوە دێت کە پۆلیسی ئەو وڵاتە رایگەیاند، “رێکخراوی قاعیدە بەنیازە لە بەریتانیا و ژمارەیەک وڵاتی دیکەی ئەوروپا زنجیرەیەک هێرش ئەنجامبدات”.

بۆ دۆزینەوەی زەواهیری، بڕیارە هێزەکانی ئەمریکا و بەریتانیا پشت بەو زانیارییە هەواڵگرییانە ببەستن کە لەلایەن فەرمانگەی هەواڵگری نهێنی بەریتانیا، فەرمانگەی پەیوەندییە حکومییەکانی ئەو وڵاتە و سی ئای ئەیەوە کۆکراونەتەوە.

مانگی رابردوو، پۆلیسی لەندەن رایگەیاند، لە سەرەتای دەستپێکردنی قەدەخەی هاتووچۆوە، سێ پلانی هێرشی “تیرۆریستییان” لە بەریتانیا پووچەڵکردووەتەوە، هەروەها لە ساڵی 2017ـەوە 28 پلانی هێرشی “تیرۆریستی” پووچەڵکراونەتەوە.

هاوکات پێشتر لەبارەی ئەیمەن زەواهیری، چەند دەنگۆیەک بڵاوبوونەوە کە گوایە لە شوێنی خۆحەشاردنی لە یەکێک لە ناوچە شاخاوییەکانی ئەفغانستان بەهۆی تەنگەنەفەسییەوە مردووە، بەڵام دەنگۆکان پشتڕاستنەکراونەتەوە .

بەشی بکە لە
Previous Next
Close
Test Caption
Test Description goes like this