عێراق: لە دروستکردنی وێستگەی ئەتۆمدا هاوکاری هەرێم دەکەین

0
313

SNN

دەستەی عێراقی بۆ کۆنتڕۆڵکردنی سەرچاوە تیشکدەرەکان رایگەیاند: “تا ساڵی 2030 عێراق دەبێتە خاوەنی هەشت وێستگەی ئەتۆم و نزیکەی 14% بۆ 25%ی کارەبای عێراق لەو وێستگانە بەرهەم دێت، دەشڵێت ئەگەر هەرێمی کوردستان بیەوێت ببێتە خاوەنی وێستگەی ئەتۆم هاوکاری دەکەن”.

کەمال حسێن، سەرۆکی دەستەی عێراقی بۆ کۆنتڕۆڵکردنی سەرچاوە تیشکدەرەکان لە لێدوانێکيدا رايگەياندووە: “پلانمان بۆ دامەزراندنی هەشت وێستگەی ئەتۆم بۆ بەرهەمهێنانی کارەبا داناوە، ئەمساڵ دەست بە دروستکردنی یەکەم وێستگە دەکەین”.

ئاماژەی بەوەشکردووە: “لەگەڵ رووسیا و فەڕەنسا و کۆمپاکانیاکانیان لە گفتوگۆداين، گفتوگۆکان لەگەڵ رووسەکان نزیکبوونەتەوە بۆ لێکتێگەیشتنی تەواوەتی، لەگەڵ فەڕەنسییەکانیش لەسەر هێڵين و چەندجارێک گفتوگۆمان کردووە”، وتیشی: “لەبەرنامەماندایە لەگەڵ ئەمریکا و چینیش بۆ ئەو مەبەستە قسە بکەین”.

لەبارەی ئامانجی دامەزراندنی ئەو وێستگە ئەتۆمیانە وتی: “ئەو هەشت وێستگە ئەتۆمییەی پلانمان هەیە تاوەکو ساڵی 2030 دایانبمەزرێنین لەنێوان 8 بۆ 10 هەزار مێگاوات کارەبایان لێ بەرهەم دەهێنرێت، بەمەش 14٪ بۆ 25٪ی کارەبای عێراق لە رێگەی ئەو وێستگە ئەتۆمیانە بەرهەمدێت”.

کەمال حوسێن باسی لەوەشکرد: “پڕۆژەکە دەبێتە هۆی کەمکردنەوەی پشتبەستنی عێراق بە سووتەمەنی بۆ بەرهەمهێنانی کارەبا و کەمکردنەوەی ئەو کاریگەرییە خراپانەی بەهۆی دەرپەڕاندنی گازی دوانۆکسیدی کاربۆنەوە هەیە، سەبارەت بە دامەزراندنی وێستگەی ئەتۆم لە هەرێمی کوردستان، وتی: “هەرێم لەرووی بەرهەمهێنانی کارەباوە باشترە، بەڵام دەبێت واز لە پشتبەستن بە سووتەمەنی بهێنێت، ئەگەر بیەوێت بۆ بەرهەمهێنانی کارەبا وێستگەی ئەتۆم دابمەزرێنێت، ئێمە ئامادەین راوێژی بێبەرامبەری پێبدەین”.

بەشی بکە لە
Previous Next
Close
Test Caption
Test Description goes like this