مەرزە لاوەكییەكان تا چەند بوونەتە مەترسی سەرهەڵدانەوەی كۆرۆنا لە هەرێم؟

0
684
مەرز

SNN- عەلی حەمە سەعید

لەگەڵ ئەوەی لە ئێستادا تاڕادەیەك مەترسییەكانی بڵاووبوونەوەی ڤایرۆسكی كۆرۆنا لە هەرێم بە بەراورد بە دوومانگی رابردوو تاڕادەیەك كەمبووەتەوە، بەڵام بوونی چەند مەرزێكی لاوەكی و بازرگانیكردنی نایاسایی هێشتا مەترسین لەسەر بڵاووبونەوەی كۆرۆنا، بەرپرسانی ئیداریش جەخت لەسەر كۆنتڕۆڵكردنی ئەو مەرزانە دەكەنەوە.

زانا رەحمان، قایمقامی قەزای پێنجوێن بە SNNی راگەیاند: لە سنوری قەزای پێنجوێن بە درێژایی 150 كلیۆمەتر هاوسنورین لەگەڵ ئێراندا لەم رووبەرەشدا دوو مەرزی فەرمی باشماخ و سەیران بەند و چەند خاڵێكی نافەرمی بونیان هەیە، بەڵام لەگەڵ سەرهەڵدان و بڵاوبوونەوەی ڤایرۆسكی كۆرنا لە وڵاتی ئێران و هەرێمی كوردستان داوامان لە پاسەوانی سەرسنوركرد كە چاودێرییەكانیان چڕبكەنەوە بۆ ئەوەی رێگری بكەن لە هەر كارێكی نایاسایی (قاچاخ) كە لەو مەرزانەو خاڵە سنورییەكانەوە ئەنجام بدرێت و خۆشبەختانە تاڕادەیەكی زۆریش توانیمان كۆنتڕۆڵی دۆخەكە بكەین.

ئاماژەی بەوەشكرد، لەماوەی داخستنی مەرزەكان و راگەیاندنی كەرەنتینەدا نزیكەی 10 كەسی ئێرانیمان ئاودیوی ئێران كردوەتەوە كە ویستویان بە قاچاخ و بە نایاسایی بێنە پێنجوێن و لە ئێستاداشدا كە مەرزی باشماخ و سەیران بەند كراونەتەوە لایەنەپەیوەندیدارەكانمان راسپاردووە كە زۆر بەچڕی رێگە لەهەركارێكی (قاچاخ) و نایاسایی بگرن بۆ ئەوەی جارێكی دیكە مەترسی بڵاوبوونەوەی كۆرنا سەر هەڵنەداتەوە.

قایمقامی قەزای پێنجوێن جەختی لەوەشكردەوە، هەریەكە لە مەرزە لاوەكییەكانی ( هەڵاڵاوا، كونەمێرو، توتمان) و چەند مەرزێكی دیكەی لاوەكی لە سنورەكەماندا بونیان هەیە بەڵام ئەم مەرزە لاوەكیانە لە دوای ئەنجامدانی ریفراندۆم تا ئێستا داخراون و كاری بازرگانیان تیادا ناكرێت و پاسەوانی سنوریش چاودێری وردیان دەكات.

لای خۆیەوە حەمید بارام، بەڕێوەبەری ناحییەی بیارەی سەر بە پارێزگای هەڵەبجە بۆ SNNئەوەی خستەڕوو، لە سنوری ناحیەكەمان جگە لە مەرزی شۆشمێ‌ هەریەكە لە مەرزەكانی( هاوار، گریانە، دزاوەر، دەگاشێخان، دەركێ‌، هانەی دن) و چەند خاڵێكی دیكەی لاوەكی بونیان هەیە، پێشتر بە چاودێری ئاسایش و پاسەوانی سنور كاری بازرگانی تیادا كراوە و ئەو كاڵایانەشی كە رەوانەی ئێران كراون گومرگ كراون، بەڵام لەگەڵ بڵاوبوونەوەی كۆرنا ئەم مەرزانە بە ڕووی بازرگانانی سنورەكەدا داخراون ڕێگە نەدراوە هیچ جۆرە هاوردە و هەناردەیەكیان تیادا ئەنجام بدرێت و خۆشبەختانە توانیمان سەرجەم ئەو مەرزانە كۆنتڕۆڵ بكەین.

روونیشكردەوە، لە ئێستادا كە دۆخەكە تاڕادەیەك بەرەو ئاسایی بوونەوە چووە، بەو پێیەی كە پاراستنی ئەو خاڵە سنوریانە لە ئەستۆی پاسەوانی سنورە، پاسەوانی سنورمان ئاگادار كردووەتەوە كە هاووڵاتیان دەتوانن كاری بازرگانی دەستپێبكەنەوە و لە ئێستادا جارێكی دیكە كاركردن لەو مەرزە لاوەكیانەدا دەستپێكردوەتەوە بەڵام بەڕەچاوكردنی ڕێكارە تەندروستیەكان كە مەترسی لەسەر دووبارە بڵاووبوونەوەی كۆرۆنا نەبێت.

بە گوێرەی ئەو ئامارانەی كە دەست SNNكەوتوون، لە ماوەی ڕاگەیاندنی كەرەنتینەدا توانراوە لە لایەن هێزەكانی ئاسایش و پاسەوانی سەر سنورە هەشت كەس دەستگیربكرێن كە هەوڵیانداوە بەشێوەیەی نایاسایی هاتوچۆی مەرزەكان بكەن و كارئاسانی بكەن بۆ هێنانی هاووڵاتی ئێرانی بۆ سنوری پارێزگای هەڵەبجە.

بەشی بکە لە
Previous Next
Close
Test Caption
Test Description goes like this