پارێزگاری دهۆک لە لێدوانێکی بە ناوی دیپلۆماتێکی ئەوروپی پاشگەز دەبێتەوە

0
423

SNN

دوای ئەوەی پارێزگاری دهۆک باسی لەوەکردبوو، کونسوڵی یەکێتی ئەوروپا لە هەرێم پارێزگای دهۆکی بە باشترین پارێزگای هەرێم و عێراق لە رووی ئازادی رادەربڕین ناوبردووە، بە ماوەیەکی کەم لەو لێدوانەی پاشگەز بووەوە و لە هەژماری خۆی لە تۆڕی کۆمەڵایەتی فەیسبووک دەستکاری ناوەرۆکی راگەیەندراوی کۆبوونەوەکەی کردوە.

پارێزگای دهۆک لە راگەیەنراوێکدا لە بارەی کۆبوونەوەی گەڵ کونسوڵی یەکێتی ئەوروپا لەهەرێم رایگەیاندبوو: “ئێوارەی رۆژی چوارشەممە 16ی حوزەیرانی 2021، فێسنت پۆمپیۆ، كونسوڵی یەكێتیی ئەورووپا لە هەرێمی كوردستان لەگەڵ عەلی تەتەر، پارێزگاری دهۆك كۆبۆتەوە و تێیدا گفتوگۆ لەبارەی ڕەوشی مرۆیی پەنابەران، بارودۆخی ناوچە سنوورییەكانی پارێزگای دهۆك، كێشەكانی پەیوەندیدار بەو وشكەساڵییەی دەڤەرەكەی گرتۆتەوە، پێكەوەژیانی خەڵكی دەڤەرەكە، ئازادیی بیروبۆچوون و ئازادیی رادەربڕین كراوە”.

هەر بە گوێرەی راگەیەنراوەکە: “لە كۆبوونەوەكەدا كونسوڵی یەكێتیی ئەورووپا لە هەرێمی كوردستان رایگەیاندووە: “دهۆك باشترین پارێزگای هەرێمی كوردستان و عێراقە بۆ ئازادیی ڕادەربڕین”.

بڵاوبوونەوەی ئەو راگەیەنراوەی پارێزگاری دهۆک لە کاتێکدایە یەکێتی ئەوروپا هاوشێوەی چەندی کونسوڵخانە و باڵیۆزخانەی وڵاتان و رێکخراوە نێودەوڵەتیەکانی داکۆکیکار لە مافەکانی مرۆڤ بە هۆی گرتن و زیندانیکردنی چالاکوانانی بادینانەوە رەخنەی توندیان ئاراستەی سەرۆکی حکومەتی هەرێم و هێزە ئەمنییەکانی هەولێر و دهۆک کردووە.

بە ماوەیەکی کەم پارێزگاری دهۆک دەستکاری ناوەرۆکی راگەیەنراوی کۆبوونەوەکەی لەگەڵ کونسوڵی یەکێتی ئەوروپا کردووە و ئەو بەشەی لێدوانەکەی لابردووە کە بە ناوی ئەو دیپلۆماتەوە باسی لە نمونەیی بوونی رەوشی ئازادی رادەربڕین لە پارێزگاکە کردبوو.

بەگوێرەی زانیارییەکان پاش ئەوەی کونسوڵەکەی یەکێتی ئەوروپا لە شێواندنی قسەکانی ئاگادار کراوەتەوە، پەویوەندی بە پارێزگاری دهۆکەوە کردووە و ناڕەزایەتی خۆی پێگەیاندووە و هەر دوای ئەوەش عەلی تەتەر دەستکاری راگەیەنراوەکەی کردووە.

لە لایەکی دیکەوە بەشدار حەسەن یەک لە پارێزەرانی سزادراوانی بادینان رایگەیاندووە: “دوو هەفتە لەمەوبەر لەگەڵ ڤینسۆ گییۆم پوپۆ، كونسوڵی یەكێتیی ئەورووپا لە هەرێمی كوردستان و نێردەی یەكێتیی ئەورووپا لە عێراق كۆبووینەتەوە و ناوبراو وتویەتی: “ئازادیی ڕادەربڕین و بیروڕا لە هەرێمی كوردستان زۆر لە پاشەكشێدایە بە تایبەت لە بادینان”.

جیا لەو پێنج رۆژنامەنووس و چالاکوانەی بادینان کە سزای شەش ساڵ زیندانیان بەسەردا سەپێنراوە، بە پێی دوایین راپۆرتی ئەمنستی ئینترنەشناڵ لە ماوەی یەک ساڵی رابردوودا 100 کەس لە سەر خۆپیشاندان و رەخنەگرتن لە دهۆک دەستبەسەرکراون کە تائێستا نزیکەی 30 کەسیان بە دەستبەسەرکراوی ماونەتەوە.

بەشی بکە لە
Previous Next
Close
Test Caption
Test Description goes like this