ئەردۆغان سوورە لەسەر کشانەوەی تورکیا لە پەیماننامەی قەدەغەکردنی توندوتیژی دژی ژنان

0
319

SNN

سەرۆککۆماری تورکیا داکۆکی لە کشانەوەی وڵاتەکەی دەکات لە پەیماننامەی ئیستەنبوڵ بۆ قەدەغەکردنی توندوتیژی دژی ژنان و دەڵێت، بە کشانەوەی لەو پەیماننامەیە رێگە بە هەڵکشانی توندوتیژی نادەن.

دوای ئەوەی لە مانگی ئاداری ئەمساڵ تورکیا بڕیاری کشانەوە لە پەیماننامەی قەدەغەکردنی توندوتیژی دژی ژنانی راگەیاند، لە رۆژانی رابردوودا دەسەڵاتی دادوەری ئەو وڵاتە سەرجەم سکاڵاکانی لە دژی ئەو بڕیارە رەتکردەوە.

رۆژی پێنج شەممە رەجەب تەیب ئەردۆغان سەرۆککۆماری تورکیا لە کاتی پێشکەشکردنی پڕۆژەی جێگرەوە بۆ پەیماننامەی قەدەغەکردنی توندوتیژی دژی ژنان رایگەیاند: “وڵاتەکەی بە واژۆکردنی ئەو پەیماننامەیە دەستی بە رووبەڕووبوونەوەی توندوتیژی دژی ژنان نەکردووە، تا بە کشانەوە لێی کۆتایی بە هەوڵەکانی لەو پێناوە بێت”.

وتیشی: “بڕیارەکەیان هەرگیز بە واتای پاشەکشێکردن لە بەرەنگاربوونەوەی توندوتیژی دژی ژنان نییە”.

ساڵی 2011 لە ئیستەنبوڵ 47 وڵات پەیماننامەی قەدەغەکردنی توندوتژی دژی ژنانیان واژۆکرد، یەکەم وڵاتیش تورکیا بوو کە واژۆی لەسەر کرد.

پاساوی کشانەوەی تورکیا لەو پەیماننامەیە ئەوەیە کە شیرازەی خێزان بەرەو هەڵوەشاندنەوە دەبات، هەروەها بەشێک لە توندڕوەکانیش پێیان وایە ئەو پەیماننامەیە رێگە بۆ هاوڕەگەزخوازان خۆش دەکات و باس لەوەشدەکەن یاسا و نەریتەکانی تورکیا وەک پێویست مافی ژنان دەپارێزن و پێویست بەو پەیماننامەیە ناکات.

لەبەرامبەردا چالاکوانانی بواری مافەکانی ژنان لەو بڕوایەدان، کشانەوەی تورکیا لە پەیماننامەی قەدەغەکردنی توندوتیژی دژی ژنان دەبێتە هۆی زیادبوونی حاڵەکانی کوشتن و توندوتیژی دژی ژنان.

هەر یەک لە یەکێتی ئەوروپا و ئەمریکا بە توندی رەخنەیان لەو بڕیارەی ئەنقەرە گرتووە لە بارەی کشانەوەی لە پەیماننامەی ئیستەنبوڵ.

بەشی بکە لە
Previous Next
Close
Test Caption
Test Description goes like this