ئەمریکا و ناتۆ گەورەترین بنکەی ئاسمانیان لە ئەفغانستان چۆڵکرد

0
390

SNN

كشانه‌وه‌ی یه‌كجاره‌كی بیانییه‌كان له‌ ئه‌فغانستان له‌ ئان و ساتدایه‌. ئه‌مه‌ریكا و ناتۆ گه‌وره‌ترین بنكه‌ی ئاسمانیان له‌ شاری باگرام به‌جێهێشت، به‌رپرسێكی باڵای ئه‌مه‌ریكایی به‌ ئاژانسی فرانس پرێسی راگه‌یاند: چۆڵكردنی باگرام ئاماژه‌یه‌ بۆ كشانه‌وه‌ی یه‌كجاره‌كی هێزه‌ بیانییه‌كان له‌ ئه‌فغانستان.

ئه‌و به‌رپرسه‌ ئه‌مه‌ریكاییه‌، روونیكردووه‌ته‌وه‌، هه‌موو هێزه‌كانی ئه‌مه‌ریكا و ناتۆ به‌ ته‌واوی له‌ بنكه‌كه‌ كشانه‌وه‌، كه‌ ته‌نیا 50 كیلۆمه‌تر له‌ باكووری كابوڵه‌وه‌یه‌.

هێشتا رانه‌گه‌یه‌ندراوه‌ كه‌ی به‌ ره‌سمی بنكه‌كه‌ راده‌ستی هێزه‌كانی حكومه‌تی كابوڵ ده‌كرێته‌وه‌.

دوای 20 ساڵ له‌ شه‌ڕ و رووبه‌ڕووبوونه‌وه‌ له‌گه‌ڵ بزووتنه‌وه‌ی تاڵیبانی ئیسلامی، له‌ شوباتی ساڵی رابردوودا، ئه‌مه‌ریكا و تاڵیبان رێككه‌وتن، دووه‌میان شه‌ڕ رابگرێت و یه‌كه‌میان به‌ ته‌واوی له‌ خاكی ئه‌فغانستان بكشێته‌وه‌.

كشانه‌وه‌ی ئه‌مه‌ریكا بووه‌ته‌ مایه‌ی نیگه‌رانی كابوڵ و حكومه‌تی ئه‌و وڵاته‌ پێی وایه‌ ره‌چاوی به‌رژه‌وه‌ندی وڵاته‌كه‌ی نه‌كراوه‌ و له‌ بڕیاری كشانه‌وه‌ی یه‌كجاری و رێككه‌وتن له‌گه‌ڵ تاڵیباندا، ئه‌مه‌ریكا رای به‌ هه‌ند وه‌رنه‌گرتوون.

به‌ گوێره‌ی رێككه‌وتنه‌كه‌ی واشنتن و تاڵیبان، ئه‌مه‌ریكا ده‌بێت تا 11ی ئه‌یلوولی ئه‌مساڵ به‌ ته‌واوه‌تی خاكی ئه‌فغانستان به‌جێبهێڵێت.

له‌ دوو مانگی رابردوودا تاڵیبان هێرشه‌كانی بۆ سه‌ر هێزه‌ حكومییه‌كانی كابوڵ چڕ كردووه‌ته‌وه‌ و به‌ گوێره‌ی زانیارییه‌ میدیاییه‌كان جگه‌ له‌ كۆنترۆڵی چه‌ند شارێكی سه‌ره‌كی، به‌ شێوه‌یه‌كی گشتیی ته‌واوی ناوچه‌كانی ئه‌فغانستان له‌ ژێر ده‌سه‌ڵاتی تاڵیباندایه‌.

به‌ كشانه‌وه‌ی ئه‌مه‌ریكا و ناتۆ له‌ بنكه‌ی ئاسمانی باگرام، ئاسایش و سه‌قامگیری كابوڵی پایته‌خت كه‌وتووه‌ته‌ به‌ر مه‌ترسی.

بەشی بکە لە
Previous Next
Close
Test Caption
Test Description goes like this