مامۆستایانى ناڕازى گه‌رمیان به‌ فه‌رمى بایكۆتى تاقیكردنه‌وه‌كانیان راگه‌یاند

0
537
گردبوونه‌وه‌ى مامۆستایانى ناڕازى له‌ گه‌رمیان | فۆتۆ: سیروان حه‌سه‌ن / SNN

SNN – سیروان حه‌سه‌ن

ئه‌نجومه‌نى مامۆستایانى گه‌رمیان بایكۆتى تاقیكردنه‌وه‌كانیان راگه‌یاند و ده‌ڵێن: “به‌ مووچه‌یه‌ك رازینابین و ساردنابینه‌وه‌ و خۆپیشاندانى فراوانیش ئه‌نجامده‌ده‌ین”.

له‌ راگه‌یانراوێكدا كه‌ كه‌مێك له‌مه‌وبه‌ر بڵاوكراوه‌ته‌وه‌ مامۆستایانى ناڕازى گه‌رمیان بایكۆتى تاقیكردنه‌وه‌كانیان راگه‌یاند و ئاشكرایانكرد، “ئێمە وەکو مامۆستایان، دڵنیایی دەدەینە هەموو لایەک و بە دەسەڵاتدارانی رادەگەیەنین، بەهیچ شێوەیەک بە مووچەیەک رازینابین و ساردنابینەوە، لە ئێستادا سەرباری جەختکردنەوە لە داوا رەواکانی پێشوومان، سوورین لەسەر بایکۆتکردنی تاقیکردنەوەکان‌ و ئەنجامدانی خۆپیشاندانی ناڕەزایی گەورە”.

له‌ به‌یاننامه‌كه‌دا ئه‌وه‌شهاتووه‌، ئه‌م هه‌ڵوێسته‌ى ئێمه‌ به‌هۆى ئه‌م خاڵانه‌ى خواره‌وه‌یه‌:

1. ئازادکردنی هاوپیشەکانمان لە بادینان و راگرتنی ئەو بێحورمەتییەی بەرامبەرمان دەکرێت.
2. پێنەدانی مووچە و یاریکردن بە کات و شعووری مووچەخۆران.
3. برسیکردنی موچەخۆری حەقیقی، لە پێناو بندیوار و دەست و پێوەندەکانیان.

هه‌ر له‌وباره‌یه‌وه‌ سه‌ریاس سه‌مین، ئه‌ندامى ئه‌نجومه‌نى مامۆستایانى گه‌رمیان به‌ (SNN)ى راگه‌یاند: “پێویسته‌ هه‌موو مووچه‌خۆران و خه‌مخۆرانى ئه‌م هه‌رێمه‌ بێنه‌ده‌نگ و پاڵپشتى مامۆستایان بكه‌ن بۆ ئه‌وه‌ى بتوانرێت فشارى جدى له‌سه‌ر ئه‌م حكومه‌ته‌ بهێندرێته‌ كایه‌وه‌”.

وتیشى: “ناكرێت ته‌نیا مامۆستایان خۆپیشاندان ناڕه‌زایی ده‌بڕن و كۆى مووچه‌خۆرانى دیكه‌وه‌ هیچ هه‌ڵوێستێكیان نه‌بێت و ئه‌گه‌ر هه‌مووان پێكه‌وه‌ هاوهه‌ڵوێست بن ئه‌وا به‌ دڵنیاییه‌وه‌ ئه‌نجامى باشى ده‌بێت به‌ ئاراسته‌ى باشكردنه‌وه‌ى مووچه‌ و كه‌مبوونه‌وه‌ى گه‌نده‌ڵى و ئه‌نجامدانى چاكسازى”.

بەشی بکە لە
Previous Next
Close
Test Caption
Test Description goes like this