لیژنەی ئەمنی سەیدسادق لە سەر راسپاردەکانی قوباد تاڵەبانی چەند بڕیارێکی دەرکرد

0
213

SNN-عەلی حەمە سەعید

بەمەبەستی جێبەجێكردنی ئەو بڕیارو ڕاسپاردانەی كە قوباد تالەبانی، جێگری سەرۆكی حكومەتی هەرێم دەریكردوون لەبارەی دەستبەسەرداگرتنی چەكی بێمۆڵەت و ئۆتۆمبێلی بێسەرەتا ئەمڕۆ لیژنەی ئەمنی سەیدسادق كۆبوویەوە و چەند بڕیارێكی دەركرد.

دیاری ڕەفیق، قایمقامی قەزای سەیدسادق بە SNNی ڕاگەیاند: “بەمەبەستی جێبەجێ كردنی بڕیارەكانی قوباد تاڵەبانی جێگری سەرۆكی حكومەت ئەمڕۆ لیژنەی ئەمنی قەزای سیدسادق لەگەڵ لێپرسراوانی پۆلیسی ناوخۆ و بەشی پۆلیسی هاتووچۆو و یاریدەردەرێتی ئاسایشی سیدسادق لە دیوانی قایمقامیەت كۆبووینەوە، ئەوەش لە پێناو دەركردنی چەند بڕیارێكی پەیوەست بە پاراستنی زیاتری ئارامی و ئاسایشی هاووڵاتیان و بنبڕكردنی دیاردەكانی پێشیلكردنی یاسا و ڕەخساندنی كەشیكی ئارامتر بۆ ڕاپەڕاندنی كاروباری ڕۆژانەی هاووڵاتیان”.

ئاماژەی بەوەشكرد، “لە كۆبوونەوەكەدا لیژنەی ئەمنی بڕیاریاندا بە ئامادەكردنی مەفرەزە هاوبەشەكان لە هێزە ئەمنیەكان بەبەردەوامی لە شەوان و ڕۆژدا و دەست بەسەرداگرتنی سەرجەم ئەو ئۆتۆمبیلانەی بێ سەرەتان و جامی ڕەش و پەردە و لەزگەیان لێدراوە یان هەڵگری تابلۆی ساختەن، هاوكات دەست بەسەرداگرتنی هەموو جۆرە چەكێكی بێ مۆڵەت ، جگە لەو چەكانەی مۆڵەتی فەرمی وەزارەتی ناخۆیان پێ دراوە”.

قایمقامی قەزای سەیدسادق ئەوەشی خستەڕوو، “هەر ئەمڕۆ لە كۆبوونەوەكەدا بڕیارماندا بە قەدەغەكردنی هەڵگرتنی چەك لە لایەن كارمەندانی وەزارەتی ناوخۆ و هێزەكانی پێشمەرگە و هێزە ئەمنیەكان لە دوای دەوامی فەرمی خۆیان، لەگەڵ ئەوەشدا لێدانی پەردە لە ئۆتۆمبێلی سەرجەم فەرمانگەكان و هێزە ئەمنیەكان و هاووڵاتیان و رەشكردنی جامەكانیان قەدەغەكرا بۆ ئەومەبەستەش داوا لە سەرجەم پێشانگاكانی جوانكاری ئۆتۆمبێل دەكەین كە نابیت كاری جامڕەشكردن و لێدانی لەزگە و پەردەبۆ هیچ جۆرە ئۆتۆمبێلێك ئەنجام بدەن، بە پێچەوانەوە سزا دەدرێت بە داخستنی شوێنەكەی”.

دیاری ڕەفیق جەختی لەوەشكردەوە، “ئاگاداری سەرجەم پیشانگاكانی كڕین و فرۆشتنی ئۆتۆمبیل دەكەین كە نابیت مامەڵە بە ئۆتۆمبێلی بێ سەرەتا و هەڵگری تابلۆی ساختە یان تابلۆی ڕەش بكەن و لە ناو پێشانگاكانیاندا بوونی هەبیت بە پێچەوانەوە سزا دەدرێن بە داخستنی شوێنەكانیان، بۆیە داواكارین لە سەرجەم هاووڵاتیان لە پێناو بەرژەوەندی گشتی و  ئارامی و پاراستنی سەر و ماڵی هەمووان هاوكارمان بن و لە كاتی جێبەجێ كردنی ئەو بڕیارانە”.

بەشی بکە لە
Previous Next
Close
Test Caption
Test Description goes like this