نزیکەی دوو هەزار کۆچبەر لە تورکیا دەستگیرکراون و دیپۆرت دەکرێنەوە
دیمەنی ژمارەیەک کۆچبەر، ئەرشیف
SNN
ئەندامی فیدراسیۆنی پەنابەرانی عێراقی لە تورکیا ڕایگەیاند، لەماوەی هەفتەیەکدا نزیکەی دوو هەزار پەنابەر لە تورکیا دەستگیرکراون و دەشڵێت، سەرجەمیان ڕەوانەی وڵاتەکانیان دەکرێنەوە.
لە ڕاگەیەنراوێکدا هیوا خدر، ئەندامی فیدراسیۆنی سەراسەری پەنابەرانی عێراقی لە تورکیا ڕایگەیاند:”لەماوەی هەفتەیەکدا نزیکەی دوو هەزار پەنابەر تەنها لە ئەستەنبوڵ دەستگیرکراون.”
ڕوونیشیکردووەتەوە، “دوێنێ پێنجشەممە، 435 پەنابەر دەستگیرکران و لەماوەی هەفتەی ڕابردووشدا تا ئەو ڕیکەوتە ژمارەی ئەوپەنابەرانەی دەستگیرکراون یەک هەزار و 559 پەنابەرن.”
ئاماژەی بەوەشکردووە، پۆلیسی ئەستانبوڵ دەڵێت:”زۆربەی ئەو پەنابەرانەی دەستگیرمان کردوون بەنایاسایی هاتونەتە ئەستەنبوڵ و لەچاوەڕوانی ئەوەدابوون بەرەو وڵاتانی ئەوروپا بڕۆن بەشێکیشیان ڤیزاکانیان بەسەرچووە و بەپێی یاسا مانەوەیان نایاساییە.”
سەبارەت بە ڕەگەزننامەکانیشیان ئاماژەی بەوەکردووە، ” ئەو پەنابەرانەی بەنایاسایی هاتونەتە ئەستەنبوڵ و دەستگیرکراون زۆرینەیان خەڵکانی (ئەفغانستان و پاکستان و سوریان) بەڵام سەرجەم پەنابەرەکان خەلکانی 24 وڵاتن لەنێوانیشیاندا عێراق.”
هاوکات سەبارەت بەچارەنوسی پەنابەرەکانیش پۆلیسی ئەستەنبوڵ ڕایگەیاندووە، “سەرجەمیان ڕەوانەی بەڕێوەبەرایەتی کۆچ و کۆچبەران کراون تا لەوێوە ڕێکارەکانی دیپۆرتکردنەوەیان بۆ ووڵاتەکانیان ئەنجامبدرێت”.
