بەپێچەوانەی قسەکانی وەزيری سامانە سروشتييەکان نرخی بەنزين دانەبەزيوە

0
462

SNN-عەلی حەمە سەعید

هەرچەندە بە وتەی وەزیری سامانە سروشتییەكان دەبوو ئەمڕۆ نرخی لیترێك بە نزینی نۆرماڵ لە 850 دینارەوە دابەزێت بۆ 650 دینار، بەڵام هیچ گۆڕانكارییەك بەسەر نرخی بەنزیندا نەهاتووە و نرخی گازیش زیاتر گران بووە، بەڕێوەبەری نەوت و كانزاكانی سلێمانیش دەڵێت نازانین كەی گۆڕانكاری لە نرخی بەنزین دەكرێت.

محەمەد حەسیب، بەڕێوەبەری نەوت و كانزاكانی سلێمانی بە SNNی ڕاگەیاند: تا ئێستا هیچ بڕە بەنزینێكمان لەلایەن حكومەتی عێراقییەوە بەدەست نەگەیشتووە و ناشزانین كەی ئەو بڕە بەنزینەی كە وەزیری سامانە سروشتییەكان باسی لێوە كردووە دەگات بە دەستمان بۆیە نرخی بە نزین لە سنووری پارێزگای سلێمانی هەروەك خۆیەتی و هیچ گۆڕانكارییەكی بەسەردا نەهاتووە.

ئاماژەی بەوەشكرد، نازانین میكانیزمی ناردنی ئەو بڕە بەنزینەی كە باسی لێوە دەكرێت ڕۆژانە یەک ملیۆن لیتر بەنزین ڕەوانەی هەرێم دەكرێت چۆنە و بە چ شێوازێك دابەشدەكرێت، بۆیە تا ئێستا هیچ نوسراوێكی فەرمیمان بەدەست نەگەیشتووە بۆیە ناتوانین هەر لەخۆمانەوە قسەی لەبارەوە بكەین.

وتەكانی بەڕێوەبەری نەوت وكانزاكانی سلێمانی لە كاتێكدایە كە ( كەمال ئەتروشی) وەزیری سامانە سروشتیەكان ئەوەی ڕاگەیاند بوو كە لە ئەمڕۆوە 2021/8/23 ڕۆژانە حكومەتی عێراق بڕی یەك ملیۆن لیتر بەنزین ڕەوانەی هەرێمی كوردستان دەكات و بە نرخی 650 دینار بۆ هەر لیترێك بەسەر شۆفێراندا دابەشدەكرێت، بەڵام ئەمڕۆ هیچ گۆڕانكارییەك ڕووی نەداوە لە نرخی بەنزین.

لەلایەكی دیكەوە عەلی حەمە ساڵح سەرۆكی لیژنەی وزە و سامانە سروشتیەكان لەپەرلەمانی كوردستان ئەوەی ڕاگەیاندووە كە لە ئەمڕۆوە نرخی تۆنێك گاز لە 450 دۆلارەوە زیاد دەكرێت بۆ 500 دۆلار.

بەشی بکە لە
Previous Next
Close
Test Caption
Test Description goes like this