ئاستی ئاوی ژێر زەوەی لە هەولێر 31 مەتر دابەزیوە و 50 بیری ئاویش وشكیان كردووە

0
165
SNN-عەلی حەمە سەعید
هێشتا قەیرانی كەمی ئاوی خواردنەوە لە هەولێر بەردەوامی هەیە نەتواندراوە ئەو گرفتە چارەسەرێكی بنەڕەتی بۆ بدۆزرێتەوە، ئەوەش دوای ئەوەی هاووڵاتیانی چەندین گەڕەكی هەولێر خۆپیشاندانی ناڕەزایەتیان ئەنجامدا، بە وتەی بەڕێوەبەری ئاوی هەولێریش گرفتەكە پەیوەندی بە وشكە ساڵییەوە هەیە و لەمساڵدا ئاستی ئاوی ژێر زەوەی لە هەولێر بۆ 31 مەتر دابەزیوە.

سەردەشت عبدالخالق، بەڕێوەبەری ئاو و ئاوەڕۆی هەولێر بە SNNی ڕاگەیاند: گرفتی كەمی ئاوی خواردنەوە لە هەولێر لە سەروو دەستەڵاتی ئێمەدایە چونكە لەمساڵدا لە هەرێمی كودستان وشكەساڵی ڕوویدا و وەك پێویست باران نەباری، بۆیە ئەمە وایكردووە كە لەمساڵدا ئاستی ئاوی ژێر زەوی لەهەولێر نزیكەی ٣١ مەتر دابەزێت بەوهۆیشەوە دەیان بیر لە هەولێر ڕووبەڕووی وشك بوون بوونەتەوە.

ئاماژەی بەوەشكرد، هەوڵەكانمان بۆ چارەسەركردنی گرفتی كەمئاوی لە هەولێر بەردەوامی هەیە، لەو چوارچێوەیەشدا تائێستا توانیومانە ١١٠ بیر غەتاس و پەمپەكانیان بۆ گۆڕاوە و چاكبكرێنەوە، هاوكات لەكۆی ٥٠ بیری وشك بوو ١٨ بیر لێ دراونەتەوەو چاككراونەتەوە بەردەوامیش دەبین لە چارەسەركردنی گرفتەكانی دیكە كە ڕۆژانە ڕووبەرووی بیرەكان دەبێتەوە

عەبدولڕەحمان موهەندیس، ئەندامی ئەنجومەنی پارێزگای هەولێر بە SNNی ڕاگەیاند: ئێمە لە كۆبوونەوەی ئەنجومەنی پارێزگا بە ئامادە بوونی بەڕێوەبەری ئاو چەند لایەنێكی دیكەی پەیوەندیدار چەند ڕێنماییەكمان بۆ چارەسەركردنی گرفتی كەمئاوی لە هەولێر دەركرد كە بریتین لە پێدانی دەسەڵاتی دارایی بە بەڕێوەبەرایەتی ئاوی هەولێرو تەرخانكردنی بڕە پارەیەك بۆ چارەسەركردنی ڕووداوە لەناكاوەكان.

ئەو ئەندامەی ئەنجومەنی پارێزگای هەولێر ئەوەشی خستەروو، ئێمە داوامان كردووە كە دەبێت فەرمانگەكانی ئاو خۆیان ئاو دابەش بكەن نەك دابەشكردنی ئاو بدرێتە كەسانی خێرخواز یان كۆمپانیاو كەرتی تایبەت، لەگەڵ ئەوەشدا ڕۆتینات لەناو فەرمانگەكاندا نەمێنێت بۆ ئەوەی هەرشتێك پەیوەندی بەچارەسەری قەیرانی ئاوەوە هەبێت بەزوویی كاری تێدا بكرێت، بۆیە ئەگەر وانەكرێت بە دڵنیایی گرفتی كەمی ئاو لە هەولێر بەردەوامی دەبێت.

بەشی بکە لە
Previous Next
Close
Test Caption
Test Description goes like this