شێخ نەهرۆ ڕەتیكردووەتەوە پشتگیری لە كاندیدەكانی پارتی بكات

0
523

SNN-عەلی حەمە سەعید

هەرچەندە بەرپرسانی باڵای پارتی لە سلێمانی بە ئامانجی بەدەست هێنانی پشتگیری ڕابەری تەریقەتی كەسنەزانی سەردانی( شێخ نەهرۆ كەسنەزانی)یان كرد، لە كۆبوونەوەكەدا بەرپرسانی پارتی داوایەكی مەسعود بارزانیان بە سەرۆكی تەریقەتی كەسنەزانی گەیاند بوو كە تیایدا داوای ئەوەی كردبوو پشتگیری لە كاندیدەكانی پارتی بكات، بەڵام ناوبراو ئەو داواكارییەی پارتی ڕەتكردووەتەوە.

بە گوێرەی ئەو زانیارییانەی كە لە تەكیەی كەسنەزانی لە شاری سلێمانی دەست  SNNكەوتوون ئەوە خراوەتەڕوو: دوای ئەوەی دوێنێ‌ هەریەكە لە عارف تەیفور بەرپرسی ئەنجومەنی سەركردایەتی سلێمانی هەڵەبجەی پارتی و مەحمود مەحەمەد ئەندامی سەركردایەتی و وتەبێژی پارتی و چەند بەرپرسێكی دیكەی ئەو حزبە بە نوێنەرایەتی مەسعود بارزانی سەرۆكی پارتی سەردانی شێخ نەهرۆ كەسنەزانییان كرد لە سلێمانی بەمەبەستی گەیاندنی پەیامێكی سەرۆكی پارتی بە سەرۆكی تەریقەتی كەسنەزانی.

لە كۆبوونەوەكەی بەرپرسانی باڵای پارتی و سەرۆكی تەریقەتی كەسنەزانی داوای ئەوە کراوە شێخ نەهرۆ پاڵپشتی خۆی بۆ كاندیدەكانی پارتی ڕابگەیەنێت و داواش لە شوێنكەوتووانی تەریقەتەكەی بكات دەنگ بە كاندیدەكانی پارتی بدەن، بەڵام  شێخ نەهرۆ ئەو داوارییەی شاندەكەی پارتی ڕەتكردووەتەوە و ئاماژەی بەوەكردووە ناتوانن داواكارییەكی لەو شێوەیە قبوڵ بكەن.

SNN ئەوەشی زانیوە كە ( شێخ نەهرۆ) ئەوەی بە شاندەكەی پارتی ڕاگەیاندووە كە تەنها ئەوەندە دەتوانێت كە بە هاووڵاتیان بڵێت بەشداری پرۆسەی دەنگدان بكەن و ڕێگە نەدەن هیچ كەسێك لە جیاتی كەسی دیكە دەنگ بدات، بەڵام با هاووڵاتیان بۆخۆیان ئازاد بن دەنگ بەكێ‌ دەدەن و چ كاندیدێكیان بەلاوە پەسەندە بۆیە ئەوان ناتوانن پشتگیری خۆیان بۆ هیچ كاندیدێكی پارتی ڕابگەیەنن.

بەشی بکە لە
Previous Next
Close
Test Caption
Test Description goes like this