بافڵ جەلال تاڵەبانی كۆلێژێك بۆ سەیدسادق دروست دەكات و خەونی شەهید بڕیار دەکاتە راستی

0
1180

SNN-عەلی حەمەسەعید

دوای چەندین ساڵ لە چاوەڕوانی و داواكاری خوێندكاران و گەنجانی سنوورەكە بۆ دروستكردنی كۆلێژێك لە قەزای سەیدسادق، دواجار بافڵ جەلال تاڵەبانی بڕیاریداوە بە دروستكردنی بینای كۆلێژێكی سێ‌ نهۆمی بۆ قەزای سەیدسادق كە بڕی دوو ملیۆن و 500 هەزار دۆلار تێچووەكەیەتی، نوێنەرێكی خوێندكارانی سەیدسادق دەڵێت دروستكردنی ئەو كۆلێژە یەكێك بوو لە داخوازییەكانی (شەهید بڕیار) و سەرۆكی شارەوانی سەیدسادقیش دەڵێت”ڕووبەری 12 دۆنم زەویمان بۆ ئەو بینایە ئامادەكردووە”.

ئەیوب سلێمان، یەكێك لە خوێندكارانی زانكۆ و نوێنەری خوێندكارانی سنووری قەزای سەیدسادق لە كۆبوونەوە لەگەڵ بافڵ جەلال تاڵەبانی بە SNNی ڕاگەیاند: لە كۆبوونەوەمان لەگەڵ بافڵ جەلال تاڵەبانی هەر خوێندكارێك وەك نوێنەری شارو قەزاكەی خۆی گرفت و داواكاریەكانیان گەیاندە ناوبراو منیش وەك نوێنەری خوێندكارانی كۆلێژی سەیدسادق چەند داواكارییەكی هەنوكەیی خوێندكارانم ئاراستەی بافڵ تاڵەبانی كرد، كە سەرەكیترینیان بریتی بوو لە دروستكردنی باڵەخانەیەكی سێ‌ نهۆمی بۆ كۆلێژی سەیدسادق كە لە ساڵی 2014 ەوە باس لە دروستكردنی دەكرێت بەڵام تا ئێستا نەچووەتە بواری جێبەجێكردنەوە.

ئاماژەی بەوەشكرد، كاتێك من داخوازی و داواكارییەكانی سەیدسادقم بە بافڵ جەلال تاڵەبانی گەیاند بۆخۆی داوای لێكردم كە بچمە تەنیشتی و ڕوونكردنەوەی زیاتری پێبدەم، منیش لە نزیكەوە نەخشەی دروستكردنی بیناكە و هاوكات ڕووبەری زەوی تەرخانكراوی بیناكەم بۆ ڕوونكردەوە، و هاوكات ئەوەشم پێ ڕاگەیاند كە لە ساڵی 2014 ەوە گەنجانی سەیدسادق خۆپیشاندان دەكەن بۆ دروستكردنی ئەو كۆلێژە و تا ئێستا لەو پێناوەدا سێ‌ گەنجی سەیدسادق بوونەتە قوربانی و شەهید بوون لەسەرو هەموویانەوە شەهید بڕیار كە تاكە داواكاری دروستكردنی كۆلێژێك بوو بۆ سەیدسادق بەڵام بەو ئاواتەوە سەری نایەوە.

ئەو نوێنەرەیخوێندكارانی سەیدسادق ئەوەشی خستەڕوو، كاتێك بەوردی ئەم بابەتەم بۆ بافڵ جەلال تاڵەبانی ڕوونكردەوە و داوام لێكرد كە تا ئێستا تەنها بەڵێنی بێكردار بە خەڵكی سەیدسادق دراوە بەڵكوو ئێوە بتوانن هاوشێوەی مام جەلال چۆن توانی زانكۆیەك بۆ شاری كۆیە دروستبكات ئێوەش بتوانن كارێكی لەوشێوەیە بۆ قەزای سەیدسادق ئەنجام بدەن، لەوەڵامدا بافڵ جەلال تاڵەبانی بەڵێنی جدی پێداین كە بەدڵنیاییەوە ئەركی دروستكردنی بینایەكی سێ‌ نهۆمی بۆ كۆلێژی سەیدسادق لە ئەستۆ دەگرم.

ئەیوب سلێمان جەختی لەوەشكردەوە، هەر لە كۆبوونەوەكەدا بافڵ جەلال تاڵەبانی ڕاوێژكارێكی تایبەتی خۆی بانگكرد، دوای تەماشكردنی نەخشەكە پێی ڕاگەیاند كە بڕی دوو ملیۆن و 500 هەزار دۆلار تێچووەكەیەتی، ئەویش بەڵێنی ئەوی دا كە ئەو بڕە پارەیە بخاتە سندوقێكی تایبەت بە دروستكردنی بینای ئەو كۆلێژە و دڵنیاشی كردمەوە كە هەر ئەمساڵ بەردی بناغەی دروستكردنی ئەو كۆلێژە دادەنرێت و بەشێوەیەكی زۆر نمونەیی و پێشكەوتوو لەسەر ئەركی تایبەتی خۆی ئەركی دروستكردنی دەگرێتە ئەستۆ، بەوەش خەونی شەهید بڕیار دێتەدی كە لە خۆپیشاندانەكانی ساڵی 2014 بە لافیتەكەی دەستیەوە داوای دروستكردنی كۆلێژێكی بۆ سەیدسادق كرد بەڵام شەهیدكرا.

هەر لەو بارەیەوە حەمزە محەمەد، سەرۆكی شارەوانی قەزای سەیدسادق بۆ SNNی ڕوونكردەوە، ئێمە لە سەرۆكایەتی شارەوانی سەیدسادق پاش ئەوەی داواكاریمان ئاراستەكرا بە دابینكردنی زەوەی پێویست بۆ دروستكردنی بینای كۆلێژێك بۆ قەزاكە، لە سنووری شارەوانی و لە نزیك ناوچەی سەراوی سوبحان ئاغا ڕووبەری نزیكەی 12 دۆنم زەویمان تەرخانكردووە و لە نەخشەی بنەڕەتی شارەوانیش ئەو زەویەمان جێگیركردووە.

ئاماژەی بەوەشكرد، ئێمە لە شارەوانی سەیدسادق هەموو ئاسانكارییەك دەكەین بۆ هەركەس و لایەنێك هەستێت بە جێبەجێكردنی هەر پرۆژەیەكی خزمەتگوزاری لە سنوورەكەماندا، لەوچوارچێوەیەشدا دروستكردنی بینایەك بۆ كۆلێژی سەیدسادق یەكێكە لە پرۆژە خزمەتگوزارییەكانی تایبەت بە خوێندكاران ئێمە پێشوازی لێدەكەین و دوای دروستكردنی بیناكەش هەر خزمەتگوزارییەك لەڕووی ڕێگاسازی و ئاو ئاوەڕۆ و هەر خزمەتگوزارییەكی دیكە لە ئەستۆدەگرین بە گوێرەی تەندەری پرۆژەكە.

بەشی بکە لە
Previous Next
Close
Test Caption
Test Description goes like this