بەوێنە:ده‌ستپێكى پاڵه‌وانێتى راپید-ى یانه‌ى خانزاد ركابه‌رییه‌كى به‌هێزى به‌خۆوه ‌بینى

0
272
پاڵەوانێتی شەترەنج

سه‌نگه‌ر زرار- SNN Sport

 

له‌شارى هه‌ولێر و به‌به‌شداریی 51 كوڕ و كچه‌ یاریزانى شاره‌كانى هه‌ولێر و سلێمانى، كاروانى یارییه‌كانى 17ه‌یه‌مین پاڵه‌وانێتى شه‌تره‌نجى راپید-ى یانه‌ى شه‌تره‌نجى خانزاد كه‌وته‌ڕێ كه‌له‌پاش بڵاوبوونه‌وه‌ى ڤایرۆسى كۆرۆنا یه‌كه‌م پاڵه‌وانێتى باوه‌ڕپێكراو ده‌بێ له‌لایه‌ن یه‌كێتى نێوده‌وڵه‌تى شه‌تره‌نج/ فیدا- fideكه‌ له‌كوردستان و عێراق و ته‌نانه‌ت ناوچه‌كه‌ش رێكده‌خرێت.

 

رۆژى 20ى ئایارى 2020 پاڵه‌وانێتیه‌كه‌ به‌ئاماده‌بوونى مامۆستا ئازاد دیبه‌گه‌یی/ سه‌رۆكى یه‌كێتى شه‌تره‌نجى كوردستان و پشتیوان ئه‌حمه‌د/ سه‌رۆكى فه‌خرى یانه‌ى شه‌تره‌نجى خانزاد و دڵزار حه‌مه‌ساڵح/ سه‌رۆكى یانه‌كه‌ و ژماره‌یه‌كى تر له‌میوانان ده‌ستیپێكرد و وه‌ك رێكخه‌رانى پاڵه‌وانێتیه‌كه‌ له‌یانه‌ى شه‌تره‌نجى خانزاد-ى هه‌ولێر له‌ڕێوڕه‌سمى كردنه‌وه‌یدا ئاماژه‌یان پێدا، پاش ئاسایی بوونه‌وه‌ى بارودۆخى دواى نه‌خۆشى كۆرۆنا ئامانجیان ئه‌وه‌یه‌ دووباره‌ یاریزانان به‌پاڵه‌وانێتى نێوهۆڵه‌كان ئاشنا بكه‌نه‌وه‌ و ئه‌وانیش ده‌بێت پابه‌ندى رێنماییه‌ ته‌ندروستییه‌كان بن و ته‌وقه‌كردن نه‌كه‌ن كه‌ له‌پێش یارى و دواى كۆتاییهاتنى یارییه‌كان وه‌ك نه‌ریتێك له‌نێوان یاریزانانى شه‌تره‌نجدا ده‌كرێ، بۆ ئه‌وه‌ى به‌ته‌واوه‌تى به‌سه‌ر بارودۆخه‌كه‌ زاڵبین كه‌ هێشتا مه‌ترسیی ماوه‌.

 

پاڵه‌وانێتى راپید-ى یانه‌ى خانزاد كه‌پاڵه‌وانێتى ژماره‌ 17ى یانه‌كه‌یه‌، یارییه‌كانى به‌سیستمى سویسرى به‌ 9 جه‌وله‌ ئه‌نجامده‌درێن و كاتى یارییه‌كانیش 15 خوله‌ك و 10 چركه‌ بۆ هه‌ر جووڵه‌یه‌كه‌ و له‌ڕۆژى ده‌ستپێكیدا 3 جه‌وله‌ یارى كران و تیایدا پاش ركابه‌رییه‌كى به‌هێز هه‌ریه‌كه‌ له‌ ئاكار عه‌لى ساڵح و حسێن عه‌لى حسێن و دیدار موحه‌مه‌د زاهیر و ئاریان عه‌لى ئیحسان و دانه‌ر جه‌مال قادر به‌ بردنه‌وه‌ى هه‌ر 3 یارى خۆیان و كۆكردنه‌وه‌ى 3 خاڵ له‌پله‌كانى یه‌كه‌م تا پێنجه‌مى پاڵه‌وانێتییه‌كه‌دان.

 

وابڕیاره‌ ئه‌مڕۆ 21ى ئایارى 2020 یارییه‌كانى شه‌ش جه‌وله‌كه‌ى تریش ئه‌نجامبدرێن و په‌رده‌ى له‌سه‌ر دابنرێته‌وه‌ و ناسنامه‌ى پاڵه‌وانی پاڵه‌وانێتییه‌كه‌ و خاوه‌ن پله‌كانى یه‌كه‌م تا سێیه‌م دیارى بكرێن.

پاڵه‌وانێتیه‌كه‌ كراوه‌ و باوه‌ڕپێكراو و نێوده‌وڵه‌تییه‌ له‌لایه‌ن یه‌كێتى نێوده‌وڵه‌تى شه‌تره‌نج له‌ڕێگه‌ى یه‌كێتى شه‌تره‌نجى عێراقه‌وه‌ و بۆ كچان و كوڕان له‌ته‌واوى ئاسته‌كانى ته‌مه‌ندا 51 یاریزان به‌شدارییان تێدا كردووه‌ و لیژنه‌ى ناوبژیوانانیش پێكهاتوون له‌ (ئه‌سعه‌د ئیسماعیل/ سه‌رۆكى لیژنه‌، دیار حه‌مه‌ساڵح/ جێگرى سه‌رۆكى لیژنه‌، عه‌بدولعه‌زیز ئه‌سوه‌د/ ناوبژیوان).

 

بەشی بکە لە
Previous Next
Close
Test Caption
Test Description goes like this