نوێترین زانیاری لەبارەی دابەشكردنی مووچەی مانگی نیسان

SNN-عەلی حەمە سەعید

هەرچەندە دەبوو لە 25 مانگ دەستبكرایە بە دابەشكردنی مووچەی هەموو مانگێك بەڵام ماوەی سێ‌ مانگە حكومەت پابەندی ئەو بەڵێنەی نەبووە كە بە فەرمانبەرانی دابوو، زیاد لە 10 ڕۆژ بەسەر ئەو وادەیەدا تێپەڕیوە هێشتا مووچە دابەشنەكراوە، بەرپرسێكی وەزارەتی دارایی ئاشكرایدەكات گەنجینەكان لیستی مووچەیان ئامادەكردووە و زیاد لە 900 ملیار دیناریش لەبەردەستی وەزارەتی دارایدایە بۆ دابەشكردنی مووچە تەنها فەرمانی سەرۆكی حكومەتی ماوە.

بەگوێرەی ئەو زانیارییانەی كە لە بەرپرسێكی باڵا لەوەزارەتی دارایی بە SNNدراون ئەوەخراوەتەڕوو، لە ئێستادا بڕی زیاد لە 900 ملیار دینار لەبەردەست وەزارەتی دارایی حكومەتی هەرێمدا هەیە و هیچ گرفتێك لە ئارادا نییە بۆ ئەوەی دەستبكرێت بەدابەشكردنی مووچە چونكە بەهۆی بەرز بوونەوەی نرخی نەوت بڕێكی زیاتر داهات دەستی حكومەتی هەرێم كەوتووە بەراورد بە مانگەكانی ڕابردوو.

ئاماژەی بەوەشكرد، لەپێش پشووی جەژنی ڕەمەزانەوە گەنجینەكان بەهەمان میكانیزمی مانگی ئازار لیستی مووچەی مانگی نیسانیان ئامادەكردووە تەنها ئەوە ماوە لەلایەن سەرۆكی حكومەتەوە فەرمانبكرێت بەدابەشكردنی مووچە لەگەڵ دەستپێكردنەوەی دەوامی فەرمی لە سبەی یەك شەممەوە.

ئەو بەرپرسەی وەزارەتی دارایی ئەوەشی خستەڕوو، لە مانگی ئازار هەرچەندە پارەی پێوست لەبەردەستدا هەبوو بەڵام سەرۆكی حكومەت فەرمانی دابەشكردنی مووچەی بەوەزارەتی دارایی نەدەدا ئەمەش بووەهۆی ئەوەی دابەشكردنی مووچە زۆر لەوادەی خۆیدا دوابكەوێت و نەتواندرێت پێش جەژن مووچەی مانگی نیسان دابەشبكەین.