له چه‌ند رۆژى داهاتوودا گۆڕانكارى له دۆخى سیاسى عێراقدا رووده‌دات
حکومەتی هەرێم و حکومەتی فیدڕاڵی عێراق
SNN
ئه‌ندامێكى ئه‌نجوومه‌نى نوێنه‌ران له هاوپه‌یمانى فه‌تح رایده‌گه‌یه‌نێت، كورد و شیعه ده‌ستپێشخه‌رییه‌كه‌ى چوارچێوه‌ى هه‌ماهه‌نگیان قبوڵكردووه، ده‌شڵێت: “له چه‌ند رۆژى داهاتوودا گۆڕانكارى له كه‌شى سیاسى عێراقدا رووده‌دات”.
ڕه‌فیق ساڵحى، ئه‌ندامى ئه‌نجوومه‌نى نوێنه‌رانى عێراق ئه‌مڕۆ شه‌ممه 14ى ئایار، له لێدوانێكى رۆژنامه‌وانیدا رایگه‌یاند، “زۆرینه‌ى لایه‌نه سیاسییه‌كان به‌تایبه‌تیش كورد و شیعه ده‌ستپێشخه‌رییه‌كه‌ى چوارچێوه‌ى هه‌ماهه‌نگیان قبوڵكردووه بۆ رزگاركردنى عێراق له چه‌قبه‌ستووى سیاسى”.
وتیشى: “له‌ئێستادا له‌نێو كوتله سیاسییه‌كانى عێراق به‌شێوه‌یه‌كى چڕ پێشوازى له ده‌سپێشخه‌رییه‌كه‌ى چوارچێوه‌ى هه‌ماهه‌نگى كراوه و به‌شێوه‌یه‌كى فراوان په‌سه‌ندكراوه”.
به وته‌ى ئه‌و ئه‌ندامه‌ى ئه‌نجوومه‌نى نوێنه‌رانى عێراق، “ده‌ستپێشخه‌رییه‌كه‌ى چوارچێوه‌ى هه‌ماهه‌نگى ده‌ستپێشخه‌رییه‌كى راسته‌قینه‌یه و ده‌توانێت دۆخى عێراق له چه‌قبه‌ستوویی رزگاربكات”.
ڕه‌فیق ساڵحى جه‌خت له‌سه‌ر ئه‌وه‌شده‌كاته‌وه، “له چه‌ند رۆژى داهاتوودا گۆڕانكارى له دۆخى سیاسى عێراقدا رووده‌دات”.
