تائێستا یه‌ك كه‌سایه‌تى كورد بۆ گرتنه‌ده‌ستى لوتكه‌ى ده‌سه‌ڵاته‌كانى تۆپى پێى عیراق ناوى دێت

0
326
عەبدوڵا مەجید

سه‌نگه‌ر زرار- SNN Sport

پاش ده‌ستله‌كاركێشانه‌وه‌ى سه‌رۆك و ئه‌ندامانى یه‌كێتى تۆپى پێى عێراق و بۆ دیارى كردنى ده‌سته‌یه‌كى نوێ به‌تایبه‌ت بۆ سه‌رۆكایه‌تى كردنى یه‌كێتییه‌كه‌، ده‌نگۆى خۆكاندیدكردنى ژماره‌یه‌ك كه‌سایه‌تى وه‌رزشى بۆ گرتنه‌ده‌ستى لوتكه‌ى ده‌سه‌ڵاته‌كانى تۆپى پێى عیراق له‌ئارادایه‌ و یه‌كێك له‌وانه‌ د.عه‌بدوڵڵا مه‌جید-ى سه‌رۆكى ئێستاى یانه‌ى وه‌رزشى هه‌ولێر-ه‌.

 

د.عه‌بدوڵڵا مه‌جید له‌پاڵ هه‌ریه‌كه‌ له‌ حسێن سه‌عید و ئه‌حمه‌د رازى و ناجح حه‌مود و یونس مه‌حمود و عه‌لى جه‌بار و عه‌دنان ده‌رجال ناوى هاتووه‌ كه‌ ئه‌مه‌ى دوایی به‌هۆى وه‌رگرتنى پۆستى وه‌زیرى وه‌رزش و لاوانى عێراق له‌وانه‌یه‌ له‌هاوكێشه‌كه‌ ده‌ربكرێت.

 

به‌مه‌به‌ستى ساغكردنه‌وه‌ى ئه‌و ده‌نگۆیانه‌ى له‌شه‌قامى وه‌رزشى كوردستان و عێراق ده‌كرێن، تۆڕى هه‌واڵى سلێمانى (SNN Sport)، به‌دواداچوونى خۆى كرد و له‌مباره‌یه‌وه‌  د.عه‌بدوڵڵا مه‌جید-ى سه‌رۆكى یانه‌ى وه‌رزشى هه‌ولێر-ى له‌سه‌ر ئه‌م پرسه‌ دواند و ئه‌میش خۆكاندیدكردنى بۆ پۆسته‌كانى یه‌كێتى تۆپى پێى عیراق ره‌تنه‌كرده‌وه‌، به‌ڵام وتى: تائێستا هیچ بڕیارێكم نه‌داوه‌، خۆم هه‌ڵده‌بژێرم به‌ڵام دیار نییه‌ چ پۆستێكه‌ پۆستى سه‌رۆكه‌ یان پۆستى جێگرى سه‌رۆكه‌.

 

دواتر لێمان پرسى (پێشوه‌خته‌ كۆده‌نگییه‌ك له‌نێوان یانه‌كانى كوردستاندا هه‌یه‌ كه‌ بۆ ئه‌مجاره‌ كێ بكه‌ن به‌نوێنه‌رى خۆیان و له‌هه‌ڵبژاردنى داهاتووى یه‌كێتى تۆپى پێى عێراقدا ده‌نگى پێ بده‌ن)؟، د.عه‌بدوڵڵا مه‌جید وتى: ده‌بێ یه‌كێك هه‌بێت له‌یه‌كێتیه‌كه‌دا نوێنه‌رى هه‌رێمى كوردستان بێت، مه‌رج نییه‌ بۆ پۆستى سه‌رۆك بێت، له‌وانه‌یه‌ جێگرى سه‌رۆك یان سه‌رۆك و هه‌ر پۆستێكى تر بێت، ئه‌م بابه‌ته‌ش په‌یوه‌ندى به‌یانه‌كانه‌وه‌ نییه‌، هه‌موو كه‌س ده‌توانێ خۆى هه‌ڵبژێرێ، ئه‌گه‌ر به‌یانه‌ بێت، 2 یانه‌ى كوردستان له‌خولى نایابى تۆپى پێى یانه‌كانى عێراقدا به‌شدارن، ئه‌وانێش ئێمه‌ و زاخۆ-ین و هه‌قى خۆشمانه‌، به‌ڵام نوێنه‌رى كوردستان به‌ مه‌ركه‌زى ده‌بێت، له‌هه‌مان كاتدا هه‌ركه‌سێك خۆى بۆ پۆسته‌كان هه‌ڵده‌بژێرێ ئازاده‌، به‌ڵام دیارى كردنه‌كه‌ به‌ڕێككه‌وتن ده‌بێ له‌نێوان وه‌زاره‌تى رۆشنبیرى و لاوان و یانه‌كاندا، ئه‌وان نوێنه‌رى كوردستان دیارى ده‌كه‌ن.”.

 

شایه‌نى باسه‌ به‌هۆى سكاڵاى عه‌دنان ده‌رجال و چه‌ند یاریزانێكى ترى عێراق له‌ده‌سته‌ى پێشووى یه‌كێتى تۆپى پێى عێراق و كێشه‌یه‌كى زۆر، دواجار ده‌سته‌ى پێشووى یه‌كێتییه‌كه‌ له‌ژێر فشاردا وازیان له‌پۆسته‌كانیان هێنا و یه‌كێتى نێوده‌وڵه‌تى تۆپى پێ (فیفا) بۆ ماوه‌ى 6 مانگ تا ئاماده‌كارى كردن بۆ هه‌ڵبژاردنێكى پاك و دیارى كردنى ده‌سته‌یه‌كى نوێ كه‌ بۆ ماوه‌ى 4 ساڵ یه‌كێتیه‌كه‌ به‌ڕێوببات، ده‌سته‌یه‌كى كاتى بۆ به‌ڕێوه‌بردنى یه‌كێتى تۆپى پێى عێراق دیارى كرد.

 

بەشی بکە لە
Previous Next
Close
Test Caption
Test Description goes like this