“ناكرێت ئێمه‌ مووچه‌ بنێرین و ئه‌وان پاره‌ى نه‌وت و ده‌روازه‌كان راده‌ست نه‌كه‌ن”

0
942
مه‌نسور بعێجى، ئه‌ندامى ئه‌نجومه‌نى نوێنه‌رانى عێراق | فۆتۆ: HuriyatyNews

ئه‌ندامێكى په‌رله‌مانى عێراق رایده‌گه‌یه‌نێت: دابه‌شنه‌كردنى مووچه‌ى فه‌رمانبه‌رانى هه‌رێم له‌كاتى خۆیدا له‌ ئه‌ستۆى حكومه‌تى هه‌رێم خۆیه‌تى، چونكه‌ پابه‌ندنه‌بوون به‌ راده‌ستكردنى نه‌وت و ده‌ڵێت: “ناكرێت ئێمه‌ مووچه‌ى هه‌رێم بده‌ین و ئه‌وان پاره‌ى نه‌وت راده‌ست نه‌كه‌ن”.

مه‌نسور بعێجى، ئه‌ندامى ئه‌نجومه‌نى نوێنه‌رانى عێراق له‌ فراكسیۆنى ده‌وڵه‌تى یاسا هێرشى تووند ده‌كاته‌ سه‌ر حكومه‌تى هه‌رێم به‌هۆى ئه‌و دۆخه‌ى بۆ مووچه‌ى فه‌رمانبه‌ران دروستبووه‌ له‌ كوردستان و ده‌ڵێت: “دابه‌شنه‌كردنى مووچه‌ى فه‌رمانبه‌رانى هه‌رێم له‌ ئه‌ستۆى حكومه‌تى ناوه‌ندى نیه‌، به‌ڵكو له‌ ئه‌ستۆى حكومه‌تى هه‌رێم خۆیه‌تى، چونكه‌ پابه‌ند نه‌بووه‌ن به‌ راده‌ستكردنى نه‌وت به‌ كۆمپانیاى سۆمۆ و داهاتى ده‌روازه‌ سنوورییه‌كانیشیان نه‌ ناردووه‌ بۆ ناوه‌ند، تا ئێستاش كه‌س نازانیت ئه‌و پارانه‌ بۆ كوێ چوون و چیان لێ هاتووه‌؟”.

ئه‌و په‌رله‌مانتاره‌ ئاماژه‌ به‌وه‌شده‌كات: “گه‌لى ئێمه‌ له‌ هه‌رێمى كوردستان له‌وه‌ تێده‌گه‌ن كه‌ حكومه‌تى ناوه‌ندى دژى ناردنى مووچه‌ و شایسته‌ داراییه‌كانیان نیه‌، به‌ڵام له‌ هه‌مانكاتدا ناكرێت و ناگونجێن ئێمه‌ پاره‌ى مووچه‌ بۆ ئه‌وان بنێرین و ئه‌وان داهاته‌كانیان نه‌نێرن بۆ ئێمه‌”.

بعێجى له‌ به‌شێكى ترى قسه‌كانیدا ئه‌وه‌شده‌خاته‌ڕوو: “نه‌وت و سه‌رچاوه‌ سروشتیه‌كانى تر و داهاتى عێراق موڵكى هه‌موو تاكێكى ئه‌م نیشتیمانه‌یه‌ و پێویستیشه‌ به‌ یه‌كسانى به‌سه‌ریاندا دابه‌ش بكرێت، له‌به‌ر ئه‌وه‌ ناگونجێت ئێمه‌ پاره‌ بده‌ین و له‌ به‌رامبه‌ردا هیچ وه‌رنه‌گرینه‌وه‌”.

وته‌كانى ئه‌و په‌رله‌مانتاره‌ له‌كاتێكدایه‌ به‌هۆى ناكۆكیه‌كانى نێوان هه‌ولێر و به‌غدا و نه‌ناردنى پاره‌ى مووچه‌ى فه‌رمانبه‌ران له‌كاتى خۆیدا له‌لایه‌ن حكومه‌تى ناوه‌ندیه‌وه‌ و ئه‌و قه‌یرانه‌ داراییه‌ى هه‌رێم تێیكه‌وتووه‌ نزیكه‌ى دوو مانگه‌ مووچه‌خۆرانى هه‌رێم مووچه‌یان وه‌رنه‌گرتووه‌، دابه‌شكردنى مووچه‌ هه‌رچه‌نده‌ به‌رده‌وامه‌، به‌ڵام زۆر به‌ سستى به‌ڕێوه‌ده‌چێت.

بەشی بکە لە
Previous Next
Close
Test Caption
Test Description goes like this