دابەشنەكردنی مووچە لەكاتی خۆیدا چ دۆخێكی بۆ هاووڵاتیان و دوكانداران خوڵقاندووە

0
236
بازاڕی هەڵەبجە

SNN-عەلی حەمە سەعید

لەگەڵ ئەوەی ئەمڕۆ كۆتا رۆژی رەمەزانە و هاووڵاتیان روویان لە بازاڕكردووە بۆ كڕینی پێداویستی جەژنیان، بەڵام بە وتەی هاووڵاتیان و دوكاندارانی بازاڕی هەڵەبجە، حكومەتی دۆخێكی وەهای خوڵقاندووە كە هیچ متمانەیەك نەبێت لەبەردەوام بوونی دابەشكردنی مووچە لەمانگەكانی داهاتوودا ئەو مووچەیەشی ئەم مانگە دابەشكرا دراوەتەوە بە قەرزی مانگەكانی پێشوودا.

یاسین محەمەد، یەكێك لە هاووڵاتیانی هەڵەبجە بە SNNی راگەیاند: ئەمڕۆ كە كۆتا رۆژی مانگی رەمەزانە و سبەی یەكەم رۆژی جەژنە هاتومەتە بازاڕ بۆ ئەوەی بە شێك لە پێداویستی رۆژی جەژن بكڕم بەڵام ئەوەی تێبینی دەكەم هەرچەندە بازاڕ قەرەباڵغە بەڵام ساردییەك بە بازاڕەوە بەدیدەكرێت لە كڕینی خۆراك و شمەك و كاڵا چونكە دۆخی دارایی هاووڵاتیان بە جۆرێكە ناتوانن وەك ساڵانی رابردوو هەرچییەكیان بوێت بیكڕن ئەوەش بەهۆی ئەوەی مووچە لە كاتی خۆیدا دابەشناكرێت و هیچ بەرچاو روونییەكیش نییە كە لە مانگەكانی داهاتوودا چ دۆخێكی دیكەی ناخۆش بەرۆكی هاووڵاتیان دەگرێت ئەوەش بەهۆی نەبوونی هیچ متمانەیەك بەو بەڵێنانەی كە بەرپرسانی حكومەت بە هاووڵاتیانی دەدەن.

حەمزە محەمەد، مامۆستا لە یەكێك لە قوتابخانەكانی هەڵەبجە بۆ SNN ئەوەی خستەڕوو، ئەو دۆخەی كە هاتوەتە ئاراوە هاوڵاتیانی دوور خستوەتەوە لە كڕینی كۆمەڵێك بابەت و پێداویستی ناوماڵ كە ساڵانی رابردوو لەكاتی هاتنی جەژنە و بۆنەكاندا دەیانكڕین، بەڵام ئەم جەژنە هاوڵاتیان تەنها هەوڵ بۆ دابینكردنی خۆراك و پێداویستی رۆژانی جەژنیان دەدەن بەتایبەت موچەخۆران چونكە ئەو موچەیەی وەرمان گرتووە دەبێت بەشی 60 رۆژی دیكەمان بكات ئەمەش وایلێكردوین كە نەتوانین بەدڵی خۆمان پێشوازی لە جەژن بكەین ئەوە سەرەڕای ئەوەی بەشێكی زۆری موچەخۆران مووچەی ئەم مانگەیان داوەتەوە بە قەرزی مانگەكانی پێشووتریاندا.

راستی رەفیق، یەكێك لە دوكاندارانی ناوبازاڕی هەڵەبجە، كە دوكانی فرۆشتنی وشكەی هەیە بۆ SNN ئەوەی باسكرد، ئامادەكارییەكانی هاوڵاتیان بۆ پێشوازیكردن لە رۆژانی جەژن هەروەك رۆژێكی ئاسایی بەڕێوەدەچێت بەو پێیەی كە من لەم بازاڕەدام شتێكی جیاواز نابینم لەڕووی زیاتر فرۆشتنی خۆراك و پێداویستی جگە لەوەی قەرەباڵغییەكی زۆر لە بازاڕدروستبووە.

ئەوەشی خستەڕوو، بەهۆی ئەوەی بەشێكی زۆری هاوڵاتیان موچەخۆران پشت بە مووچە دەبەستن بۆ دابینكردنی بژیوی ژیانیان هاوكات مووچەش بەو دۆخەدا تێدەپەڕێت كە هەمووان دەیبینین وایكردووە كە هاووڵاتیان نەتوانن بەدڵی خۆیان خۆراك و شمەك بكڕن، بە نموونە من كڕیاری خۆمم هەیە مووچەی مانگانەی 670 هەزار دینارە ئەم مانگە 450 هەزار دینار قەرزی بۆ هێناومەتەوە كە لە مانگەكانی پێشوو بەهۆی دواكەوتنی مووچەوە خۆراكی بردووە و پارەی پێنەبووە، بۆیە پڕبەدڵ پێم ناخۆشە رۆژانە ئەو ئەو دیمەنانە دەبینم ئێمەشی خستوەتە دۆخێكە نازانین چۆن مامەڵە بكەین دەبێت تەنها نزا بكەین خوا ئەم دۆخەمان بۆ چاك بكات.

بەشی بکە لە
تاگەکانهەڵەبجە
Previous Next
Close
Test Caption
Test Description goes like this